ត្រាំ ចេញសារព្រមានអ៊ីរ៉ង់ រឿងច្រក Hormuz

បទឈប់បាញ់ដ៏ផុយស្រួយរវាងអាមេរិកនិងអ៊ីរ៉ង់ ចូលជាធរមានមិនទាន់បានប៉ុន្មានថ្ងៃស្រួលបួលផង ស្រាប់តែពេលនេះ ប្រមុខសេតវិមាន ដូណាល់ ត្រាំ ហាក់មិនពេញចិត្តចំពោះទីក្រុងតេហេរ៉ង់ ដោយចេញសារព្រមានលើបណ្តាញសង្គម Truth Social បន្ទោសអ៊ីរ៉ង់ ពាក់ព័ន្ធរឿងច្រកសមុទ្រ Hormuz។

បង្ហោះសារកាលពីថ្ងៃព្រហស្បតិ៍ទី៩ខែមេសាឆ្នាំ២០២៦ ប្រធានាធិបតីអាមេរិក សរសេរថា អ៊ីរ៉ង់ អត់ត្រូវយកថ្លៃសេវាកប៉ាល់ដឹកប្រេងដែលឆ្លងកាត់ច្រក Hormuz​ ទេ។

លោកបញ្ជាក់យ៉ាងច្បាស់ថា៖ «មានសេចក្ដីរាយការណ៍ថា អ៊ីរ៉ង់កំពុងទាមទារយកកម្រៃសេវាពីកប៉ាល់ដឹកប្រេង ដែលធ្វើដំណើរឆ្លងកាត់ច្រកសមុទ្រ Hormuz។ យកល្អ ពួកគេកុំធ្វើបែបហ្នឹងឲ្យសោះ ហើយប្រសិនបើពួកគេកំពុងធ្វើមែន សូមបញ្ឈប់ឥឡូវនេះ»។

មិនយូរប៉ុន្មានក្រោយមក លោកត្រាំបានបង្ហោះសារមួយទៀតដែលជាការព្រមានដល់អ៊ីរ៉ង់ថា៖ អ៊ីរ៉ង់កំពុងធ្វើការងារបានយ៉ាងអន់បំផុត ឬអ្នកខ្លះអាចនិយាយបានថាគ្មានកិត្តិយសទាល់តែសោះ ក្នុងការអនុញ្ញាតឲ្យប្រេងឆ្លងកាត់ច្រកសមុទ្រ Hormuz។ នោះមិនមែនជាកិច្ចព្រមព្រៀងដែលយើងមានជាមួយគ្នាឡើយ!»។

ការព្រមានរបស់លោកត្រាំនេះ កើតឡើងក្រោយពេលមានការផ្សព្វផ្សាយថា អ៊ីរ៉ង់ចង់ទាមទារយកកម្រៃផ្លូវ ពីកប៉ាល់ដែលធ្វើដំណើរឆ្លងកាត់។

សារព័ត៌មាន Financial Times បានស្រង់សម្ដីលោក Hamid Hosseini ដែលជាអ្នកនាំពាក្យសហភាពអ្នកនាំចេញប្រេង ឧស្ម័ន និងផលិតផលគីមីឥន្ធនៈរបស់អ៊ីរ៉ង់ កាលពីថ្ងៃពុធថា អ៊ីរ៉ង់នឹងទាមទារការបង់ថ្លៃកម្រៃផ្លូវជា «រូបិយបណ្ណគ្រីបតូ» ដើម្បីរក្សាការគ្រប់គ្រងលើច្រកសមុទ្រ Hormuz ក្នុងអំឡុងពេលនៃបទឈប់បាញ់រយៈពេលពីរសប្តាហ៍ជាមួយសហរដ្ឋអាមេរិក។

យ៉ាងណា ដំណឹងនេះបានទទួលប្រតិកម្មយ៉ាងខ្លាំងពីសំណាក់មេដឹកនាំបស្ចិមប្រទេស ហើយមានការចេញមកប្រឆាំងជាបន្តបន្ទាប់៕

អត្ថបទ៖ សុខ សុវណ្ណ