លោក Honda ចង់បំបែកកំណត់ត្រាពិភពលោក ទើបបោះបង់ការចូលនិវត្តន៍ ផ្លាស់ទៅក្លិបមួយនៅ សិង្ហបុរី

អតីតអ្នកចាត់ការជម្រើសជាតិ កម្ពុជា លោក Keisuke Honda ដាក់ផែនការចង់បំបែកកំណត់ត្រាពិភពលោក (Guinness World Record) ជាកីឡាកររកគ្រាប់បាល់នៅលីគកំពូល ក្នុងប្រទេសនីមួយៗច្រើនបំផុត ទើបបោះបង់ការចូលនិវត្តន៍ ត្រឡប់មកប្រកបអាជីពជាកីឡាករបាល់ទាត់វិញ ដោយចូលរួមជាមួយក្រុម FC Jurong នៃលីគកំពូល សិង្ហបុរី។

នៅព្រឹកថ្ងៃ សុក្រ ទី ១០ ខែ មេសា ឆ្នាំ ២០២៦ នេះ ក្លិប FC Jurong បានប្រកាសជាផ្លូវការអំពីការចុះកិច្ចសន្យាយកបានអតីតខ្សែប្រយុទ្ធ AC Milan និងជម្រើសជាតិ ជប៉ុន កីឡាករ Honda មកចូលរួមសម្រាប់រដូវកាល ២០២៦ – ២០២៧​ ដើម្បីប្រកួតប្រជែងក្នុងលីគកំពូល សិង្ហបុរី Singapore Premier League។

ក្រោយប្រកាសចូលរួមជាផ្លូវការ លោក Honda បាននិយាយក្នុងសេចក្តីថ្លែងការណ៍របស់ក្លិបថា៖ «ខ្ញុំពិតជារីករាយណាស់ដែលបានទទួលឱកាសលេងឱ្យ FC Jurong។ ខ្ញុំនឹងឈានចូលអាយុ ៤០ ឆ្នាំក្នុងឆ្នាំនេះ។ ខ្ញុំកំពុងជម្រុញខ្លួនឯង ក្នុងការប្រកួតប្រជែងជាច្រើន រួមទាំងការបង្កើតកំណត់ត្រាពិភពលោក Guinness ជាកីឡាករស៊ុតបញ្ចូលទីនៅលីគកំពូល តាមប្រទេសនីមួយៗច្រើនបំផុត»។

គួរឱ្យដឹង ថា នេះជាការត្រឡប់មកប្រកបអាជីពជាកីឡាករបាល់ទាត់ឡើងវិញរបស់អតីតខ្សែប្រយុទ្ធ AC Milan វ័យ ៣៩ ឆ្នាំរូបនេះ បន្ទាប់ពីលោកប្រកាសចូលនិវត្តន៍ម្តងរួចមកហើយកាលពីឆ្នាំ ២០២៤។ គិតត្រឹមពេលនេះ លោក Honda បានលេងឱ្យលីគក្នុងប្រទេសចំនួន ដូចជា ជប៉ុន ហូល្លង់ រុស្ស៊ី អ៉ីតាលី ម៉ិកស៉ិក អូស្ត្រាលី ប្រេស៊ីល អាហ្ស៊ែបៃហ្សង់ លីទុយអានី ប៊ុយតង់ និងចុងក្រោយនេះ សិង្ហបុរី៕

អត្ថបទ៖ សេម កុសល