គំនូរបង្ហាញពីសង្គ្រាមឈ្លានពានរបស់ថៃលើកម្ពុជា ត្រូវបានគូរជាប់លើជញ្ជាំងរោងទូកងក្នុងខេត្តព្រៃវែង ទុកជាការចងចាំ

គំនូរ៤ផ្ទាំង ដែលបង្ហាញពីការសង្គ្រាមឈ្លានពានរបស់យោធាថៃមកលើប្រទេសកម្ពុជា ដែលទើបបញ្ចប់ការគូរជាប់លើជញ្ជាំងរោងតម្កល់ទូកទូកងវែងជាងគេលើពិភពលោក ឈ្មោះ“សន្តិបាលាគារកម្ពោជិកបុត្តាខេមរាតរី” នៅឯខេត្តព្រៃវែង ត្រូវបានដាក់បង្ហាញជាផ្លូវការនៅថ្ងៃទី១៣ ខែមេសា ឆ្នាំ២០២៦នេះ ដើម្បីទុកជាការចងចាំសម្រាប់ប្រជាជាតិខ្មែរ។

តាមការបញ្ជាក់របស់លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ ផ្ទាំងគំនូរទាំង៤ផ្ទាំងនេះ គឺបានបញ្ជាក់ពីការចងចាំនូវការឈឺចាប់របស់ប្រជាជាតិខ្មែរ ក៏ប៉ុន្តែមិនមែនមានន័យថាបង្កើតឡើងក្នុងគោលបំណងញុះញង់ ឬបង្ហាញពីការគុំកួនសងសឹកនោះទេ។

លោកបានមានប្រសាសន៍នៅក្នុងពិធីសម្ពោធផ្ទាំងគំនូរនោះ ថា គំនូរទាំងនេះមានគោលដៅដាស់ស្មារតីជនរួមជាតិដែលនៅទីនេះ ពោលគឺប្រជាពលរដ្ឋក្នុងខេត្តព្រៃវែងទាំងមូល និងភ្ញៀវទេសចរដែលមកកម្សាន្តក្នុងខេត្តនេះឱ្យចងចាំអំពីទង្វើឈ្លានពានរបស់កងទ័ពថៃមកលើទឹកដីកម្ពុជា និងជាការរំលឹកដល់វីរភាពរបស់កងទ័ព កងនគរបាល និងក្រុមគ្រូពេទ្យ ដែលបានលះបង់សាច់ស្រស់ឈាមស្រស់ តស៊ូកៀកស្មាការពារជាតិមាតុភូមិ។

ក្នុងន័យនេះ លោកឧបនាយករដ្ឋមន្ត្រី បានណែនាំឱ្យអាជ្ញាធរខេត្តព្រៃវែង ក្រោយបញ្ចប់ពិធីបុណ្យចូលឆ្នាំថ្មីប្រពៃណីជាតិខ្មែរ ត្រូវរៀបចំទស្សនកិច្ចរបស់សិស្សានុសិស្សមកពីតាមបណ្តាក្រុង-ស្រុកនានា រៀងរាល់៣ខែម្តង ដើម្បីឈ្វេងយល់អំពីប្រវត្តិសាស្ត្រ តាមរយៈផ្ទាំងគំនូរនេះ ក៏ដូចជាឈ្វេងយល់ពីទូកងវែងជាងគេលើពិភពលោកផងដែរ ដើម្បីបណ្តុះនូវស្មារតីស្រឡាញ់ជាតិដល់យុវជនជំនាន់ក្រោយ។

ទីតាំងផ្ទាំងគំនូរនេះ ត្រូវបានរំពឹងថា នឹងក្លាយជាចំណុចទាក់ទាញដ៏សំខាន់សម្រាប់យុវជន និងសាធារណៈជនថតរូបភាពអនុស្សាវរីយ៍ ជាពិសេសក្នុងឱកាសបុណ្យចូលឆ្នាំថ្មីនេះ៕