តម្លៃប្រេងអន្តរជាតិ​ធ្លាក់ចុះក្រោម ១០០ ដុល្លារ/បារ៉ែល ដោយទីផ្សារនៅតែប្រែប្រួលខ្លាំង

ទីផ្សារប្រេងអន្តរជាតិ​នៅតែបន្តប្រែប្រួលខ្លាំង ដោយ​តម្លៃកើនឡើង រួចធ្លាក់ចុះវិញ​មកក្រោម ១០០ ដុល្លារ/បារ៉ែល សម្រាប់ការជួញដូរនៅថ្ងៃសុក្រ (១៧ មេសា) នេះ ដោយសារមានសុទិដ្ឋិនិយមថា ជម្លោះនៅមជ្ឈិមបូព៌ាអាចជិតដល់ទីបញ្ចប់ ក្រោយ​បទឈប់បាញ់រយៈពេល ១០ ថ្ងៃរវាងលីបង់ និងអ៊ីស្រាអែលបានចូលជាធរមាន ហើយប្រធានាធិបតី ដូណាល់ ត្រាំ អះអាងថា សហរដ្ឋអាមេរិក និងអ៊ីរ៉ង់ អាចនឹងជួបគ្នាដើម្បីចរចានៅចុងសប្តាហ៍។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃ​ប្រេងឆៅម៉ាក Brent បានធ្លាក់ចុះ ១,៣៤ ដុល្លារ ឬ ១,៣៥% មកនៅត្រឹម ៩៨,០៥ ដុល្លារ/បារ៉ែល គិតត្រឹមម៉ោងជិត ៨ កន្លះ នៅទីក្រុងហុងកុង ខណៈតម្លៃប្រេងអាមេរិក ម៉ាក WTI បាន​ធ្លាក់ចុះ ១,៦៥ ដុល្លារ ឬ ១,៧៤% មកត្រឹម ៩៣,៤០ ដុល្លារ/បារ៉ែល។ ​តម្លៃប្រេង Brent បាន​កើនឡើងប្រមាណ ៤,៧% ពេលបិទ​ការជួញដូរកាលពីថ្ងៃព្រហស្បតិ៍។

លោក ត្រាំ បាននិយាយថា សហរដ្ឋអាមេរិកអាចនឹងជិតឈានដល់កិច្ចព្រមព្រៀងជាមួយអ៊ីរ៉ង់ ដើម្បីបញ្ចប់សង្គ្រាម ដោយកត់សម្គាល់ថា អ៊ីរ៉ង់ស្នើមិនធ្វើកម្មវិធីនុយក្លេអ៊ែររយៈពេលជាង ២០ ឆ្នាំ។ វាគឺសញ្ញានៃភាពស្រាកស្រាន្តជម្លោះដ៏សំខាន់ ដែលធ្វើឱ្យតម្លៃប្រេងធ្លាក់ចុះ ក្រោយពីបាន​កើនឡើងប្រមាណជាង ៥០% កាលពីខែមីនា ដោយសារតែការបិទច្រកសមុទ្រហ័រមូហ្ស។

ទោះបីជាយ៉ាងណាក៏ដោយ​ វិនិយោគិននៅតែប្រុងប្រយ័ត្នចំពោះភាពស្រពេចស្រពិលនៃទីផ្សារ ដោយសារតែភាពស្រាកស្រាន្តនៃជម្លោះអាចគ្រាន់តែបណ្ដោះអាសន្ន ដែលធ្វើឱ្យហានិភ័យលើការផ្គត់ផ្គង់នៅតែខ្ពស់៕