អាកាសធាតុក្តៅ តែទិន្នផលឪឡឹកកសិករ​នៅ​ស្រុក​​​មោងឫស្សី​នៅ​តែ​ផ្តល់​ផលល្អ មានឈ្មួញ​ចាំ​កក់មុនថែមទៀត

ដំណាំឪឡឹករបស់កសិករនៅក្នុងស្រុកមោងឫស្សី ខេត្ត​បាត់ដំបង​នៅ​តែ​លូតលាស់បានផល​​ល្អមិនរុះរោយផ្កាឬក្តិបនោះទេ បើទោះឆ្នាំនេះអាកាសធាតុក្តៅខ្លាំង។

ខណៈ​ដែល​កសិករដាំដុះ​មិនប្រើប្រាស់ជីដែលមានសារធាតុគីមី គឺប្រើប្រាស់​តែជីលាមកសត្វបានហុចផលច្រើន ហើយ​ឆ្នាំនេះទីផ្សារឪឡឹកធំទូលាយទាំងក្នុងស្រុកនិងក្នុងទីរួមខេត្ត។

លោក ឡិក ឡឹប កសិកររស់នៅ​ស្រុក​មោង​ឫស្សីបានឲ្យដឹងថា ឆ្នាំនេះក៏មិនខុសពីឆ្នាំមុនដែរ លោកបានដាំឪឡឹកលើផ្ទៃដីចំនួន ២ ហិកតា នៅទីតាំងផ្សេងគ្នាដែលលោកបានចាប់ផ្តើម​ដាំនៅដើមខែមេសានេះ។ ចំណែកទិន្នផលលោកថា មានឈ្មួញ​ក​ក់ទុកជាមុន ក្នុងនោះមានឈ្មួ​ញនៅខេត្តកំពង់​ឆ្នាំងនិងអ្នកនៅភ្នំពេញ ដោយមិនពិបាកដឹកចូលទីផ្សារដូចឆ្នាំមុននោះទេ។

សម្រាប់ការប្រមូលផលវិញ​ លោក ឡិក ឡឹប បាន​បញ្ជាក់ថា បើទោះបីមានការបិទតាមច្រកព្រំ​ដែនកម្ពុជាថៃក៏ដោយចុះ ក៏ទិន្នផលនៅ​ក្នុងស្រុកនៅតែមានតាមតម្រូវការដដែល ខណៈ​ការ​ដាំដុះ​តាមបែបធម្មជាតិធ្វើឲ្យសុខភាពអ្នកបរិភោគកាន់​តែ​ប្រសើរ​។

ការដាំឪឡឹករបស់លោក ឡិក ឡឹប ធ្វើឡើងតាមទម្លាប់មិនមានបច្ចេកទេសបន្ថែមអ្វីទេ។ សំខាន់លោកបានរក្សាគ្រាប់ពូជរាល់រដូវកាល ដែលលោកបានជ្រើសយកផ្លែល្អសម្រាប់យកគ្រាប់ពូជ លោកមិនដែលទិញគ្រាប់ពូជពីទីផ្សារនោះទេ។

លោក ឡិក ឡឹប បាន​ប្រាប់​ថា សម្រាប់ទិន្នផលឆ្នាំនេះ បើគិតមកដល់ពេលនេះឈ្មួញបានកក់លុយប្រមាណ ៤០ ភាគ​រយ​ហើយ។ បើធៀបឆ្នាំមុន ក្នុងមួយហិកតាប្រាក់ចំណូលបានកើនជាងឆ្នាំមុន ខណះការលក់រាយក្នុង ១ ផ្លែបានចន្លោះ​ពី​៣ ០០០ រៀល ទៅ ៥ ០០០ រៀល ហើយផ្លែខ្លះបានតម្លៃ ៦ ៥០០ រៀល ដែលជាផ្លែអាចយកគ្រាប់ពូជបាន។

ជាមួយ​គ្នានេះ លោកក៏​​អំពាវដល់ប្រជាពលរដ្ឋក្នុងស្រុក បន្ត​ជួយគាំទ្រដល់កសិផលក្នុងស្រុកឲ្យកាន់តែច្រើន ដើម្បី​លើកទឹកចិត្តដល់កសិករផ្សេងៗឲ្យងាកមក​ដាំ​ដុះដំណាំឪឡឹកក្នុងស្រុកតាមបែបធម្មជាតិ និង​ដើម្បីបម្រើ​ដល់សេដ្ឋកិច្ចក្នុងគ្រួសារកសិករ​ក្រោយពីមានផ្ទៃដីទំនេរពីដំណាំស្រូវវស្សា ដែលនឹងឈានចូលមកដល់នៅពេលដ៏ខ្លីខាងមុខនេះ៕

អត្ថបទ÷សៅ សារិទ្ធ