ឃាត់ខ្លួនសន្តិសុខក្រុមហ៊ុន ៥ នាក់ ប្រើឧបករណ៍​ឆក់​ទៅលើពលរដ្ឋឲ្យរងរបួស

កម្លាំងសមត្ថកិច្ចជំនាញនៃអធិការដ្ឋាននគរបាលស្រុកអូរគ្រៀងសែនជ័យ បានធ្វើការឃាត់ខ្លួនក្រុមសន្តិសុខក្រុមហ៊ុនចំនួន ៥ នាក់ ជាបន្តបន្ទាប់ ក្រោយពីបានប្រើប្រាស់ហិង្សាដោយចេតនាមានស្ថានទម្ងន់ទោស (ប្រើឧបករណ៍ឆក់) ទៅលើប្រជាកសិករម្នាក់ បណ្ដាលឲ្យរងរបួសត្រង់ពោះ។

ហេតុការណ៍នេះបានកើតឡើងនៅវេលាម៉ោង ១៥:២០នាទី ថ្ងៃទី ២៣ ខែមេសា ឆ្នាំ២០២៦ នៅចំណុចចំណបរកា ភូមិ​ទោង ឃុំរលួសមានជ័យ ស្រុកអូរគ្រៀងសែនជ័យ ខេត្តក្រចេះ។

ជនរងគ្រោះឈ្មោះ គឿន គេង ភេទប្រុស អាយុ ៤៩ឆ្នាំ មុខរបរកសិករ រស់នៅភូមិទោង ឃុំរលួសមានជ័យ (រងរបួសត្រង់​ពោះខាងស្តាំ)។ ជនសង្ស័យ (សន្តិសុខក្រុមហ៊ុន ហ្គ្រេតវ៉ែនឌើ អេហ្គ្រីខលឈើរ័ល) ឈ្មោះ រុន ឌឿន ភេទប្រុស អាយុ ៥៩ ឆ្នាំ (ប្រធានសន្តិសុខ)។ ឈ្មោះ ហឿង ប៊ុណា ភេទប្រុស អាយុ ៣៧ ឆ្នាំ។ ឈ្មោះ ទី វ៉ាន់ណា ភេទប្រុស អាយុ ៤២ ឆ្នាំ។ ឈ្មោះ ពឿន ប្រុស ភេទប្រុស អាយុ ២៩ ឆ្នាំ។ ឈ្មោះ ហឿង ប៊ុនថា ភេទប្រុស អាយុ ៣៧ ឆ្នាំ។

ប្រភពពីសមត្ថកិច្ចបាន​ឲ្យ​ដឹង​ថា មុនពេលកើតហេតុ ជនរងគ្រោះបានយកម៉ាស៊ីនត្រង់ស៊ីណ័រទៅកាត់អូសរើរានចម្ការនៅក្រោយ​ផ្ទះរបស់ខ្លួន។ ខណៈនោះ ក្រុមសន្តិសុខ ៥ នាក់ ដឹកនាំដោយឈ្មោះ រុន ឌឿន ដែលកំពុងដើរល្បាតក៏បានចូលទៅចាប់យកម៉ាស៊ីនត្រង់ស៊ីណ័រពីជនរងគ្រោះ រហូតកើតមានការឈ្លោះប្រកែក និងប្រតាយប្រតប់គ្នា។

ក្នុងអំឡុងពេលប្រតាយប្រតប់​គ្នា​នោះ​ ឈ្មោះ រុន ឌឿន បានប្រើដំបងឆក់មានគ្រាប់បាញ់ទៅលើជនរងគ្រោះចំនួន ០២​គ្រាប់ចំចង្កេះខាងស្តាំ បណ្ដាលឲ្យរងរបួស។ ភ្លាមៗនោះ ប្រជាពលរដ្ឋនៅក្បែរខាងបានជួយអន្តរាគមន៍ បញ្ជូនជនរងគ្រោះ​ទៅដកគ្រាប់ចេញនៅមណ្ឌលសុខភាព និងបានដាក់ពាក្យបណ្ដឹងទៅកាន់អធិការដ្ឋាននគរបាលស្រុក​អូរគ្រៀង​សែន​ជ័យ។ ក្រោយទទួលបានព័ត៌មាន កម្លាំងជំនាញបានចុះទៅដល់កន្លែងកើតហេតុដើម្បីស្រាវជ្រាវ និងប្រមូលភស្តុតាង រហូត​ឈានដល់ការឃាត់ខ្លួនជនសង្ស័យទាំង ៥ នាក់ យកមកសាកសួរ។

បច្ចុប្បន្ន ជនសង្ស័យត្រូវបានឃាត់ខ្លួននៅអធិការដ្ឋាននគរបាលស្រុកអូរគ្រៀងសែនជ័យ ដើម្បីកសាងសំណុំរឿងបញ្ជូនទៅកាន់ការិយាល័យជំនាញខេត្ត ចាត់ការបន្តតាមនីតិវិធីច្បាប់៕

អត្ថបទ៖ ប្រុញ វិធិន