អភិបាលស្រុកគិរីវង់ ចុះពិនិត្យការស្ដារប្រឡាយទឹក​មេជាង២គីឡូម៉ែត្រ

កាលពីព្រឹកថ្ងៃទី០៥ ខែឧសភា ឆ្នាំ២០២៦ លោក ងួន ឌីណា អភិបាលនៃគណៈអភិបាលស្រុកគិរីវង់ បានដឹកនាំក្រុមការងារបច្ចេកទេស ចុះពិនិត្យការស្ដារប្រឡាយមេមួយខ្សែ ដែលមានសារៈសំខាន់ខ្ពស់សម្រាប់វិស័យកសិកម្មក្នុងមូលដ្ឋាន ដើម្បីឆ្លើយតបទៅនឹងតម្រូវការជាក់ស្ដែងរបស់ប្រជាកសិករ។

ការចុះពិនិត្យនេះ មានការចូលរួមពីលោក ហុង ជីវ សមាជិកក្រុមប្រឹក្សាស្រុក តំណាងលោក តឹក តុងលីម ប្រធានក្រុមប្រឹក្សាស្រុក ព្រមទាំងមន្ត្រីជំនាញពាក់ព័ន្ធ ដើម្បីតាមដានវឌ្ឍនភាព និងធានាគុណភាពការស្ដារប្រឡាយឱ្យមានប្រសិទ្ធភាពខ្ពស់។

តាមការបញ្ជាក់ពីលោក ងួន ឌីណា ប្រឡាយមេដែលកំពុងស្ដារនេះ មានប្រវែងសរុបជាង ២,០០០ម៉ែត្រ ស្ថិតតាមបណ្ដោយព្រំប្រទល់រវាងឃុំតាអូរ និងឃុំព្រៃរំដេង ក្នុងស្រុកគិរីវង់។ បន្ទាប់ពីស្ដាររួច ប្រឡាយនេះនឹងអាចផ្គត់ផ្គង់ទឹកស្រោចស្រពដល់ដីស្រែរបស់ប្រជាពលរដ្ឋបានប្រមាណជាង ៩០០ហិកតា។ ក្រៅពីការផ្គត់ផ្គង់ទឹកសម្រាប់បង្កបង្កើនផល ប្រឡាយមេនេះក៏មានតួនាទីសំខាន់ក្នុងការរំដោះទឹកពេលមានភ្លៀងធ្លាក់ខ្លាំង ជួយកាត់បន្ថយហានិភ័យនៃការជន់លិចភូមិ និងដំណាំកសិកម្ម ដែលធ្លាប់ជាបញ្ហាប្រឈមក្នុងតំបន់កន្លងមក។

ក្នុងឱកាសនោះដែរ លោកអភិបាលស្រុកគិរីវង់ បានអំពាវនាវដល់អាជ្ញាធរឃុំ ភូមិ និងប្រជាពលរដ្ឋដែលទទួលផល ត្រូវចូលរួមថែរក្សាប្រឡាយទឹកនេះឱ្យបានល្អ និងប្រើប្រាស់ដោយមានការទទួលខុសត្រូវ ដើម្បីធានាបាននូវអត្ថប្រយោជន៍យូរអង្វែង។

សមិទ្ធផលនេះ បង្ហាញពីការយកចិត្តទុកដាក់របស់រដ្ឋបាលស្រុកគិរីវង់ ក្នុងការដោះស្រាយបញ្ហាទឹកជាអាទិភាព ដើម្បីគាំទ្រវិស័យកសិកម្ម និងលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើង ស្របតាមទិសដៅអភិវឌ្ឍន៍របស់រាជរដ្ឋាភិបាល៕

អត្ថបទ៖ វីរៈ