អាជ្ញាធរសង្កាត់ឬស្សីកែវ ដាក់គ្រឿងចក្រស្តារប្រឡាយប្រវែង២៥០ម៉ែត្រ ដើម្បីរំដោះទឹកចេញពីតំបន់

កាលពីថ្ងៃទី២៩ ខែតុលា ឆ្នាំ២០២៥ លោក មូល វីរៈ ចៅសង្កាត់ឬស្សីកែវ នៃរដ្ឋបាលខណ្ឌឬស្សីកែវ បានដឹកនាំក្រុមការងារសង្កាត់ រួមទាំងលោកមេភូមិមិត្តភាព និងក្រុមការងារភូមិ ចុះពិនិត្យ និងសម្របសម្រួលការស្តារប្រឡាយមួយខ្សែប្រវែងប្រមាណ ២៥០ម៉ែត្រ ដែលស្ថិតនៅខាងត្បូងវិទ្យាល័យឬស្សីកែវ ក្បែររបងវត្តឧត្តរាវត្តី ដើម្បីជួយរំដោះទឹកលូ និងទឹកជំនន់ដែលកកស្ទះដោយកាកសំណល់ បណ្តាលឱ្យមានការលំបាក ជាពិសេសនៅពេលវស្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក មូល វីរៈ ចៅសង្កាត់ឬស្សីកែវបានអោយដឹងថា ការចុះស្ដារប្រឡាយនេះធ្វើឡើងក្រោមការការណែនាំពីសំណាក់លោក ជិន ប៊ុនធឿន អភិបាលខណ្ឌឬស្សីកែវ ដោយចំណាយថវិកាផ្ទាល់ខ្លួនសម្រាប់ការងារនេះ ហើយក៏ទទួលបានការ ជួយជ្រោមជ្រែង ពីលោក ស៊ន អេលីត ដែលបានឧបត្ថម្ភថវិកាក្នុងការជួលម៉ាស៊ីន អេស្កាវ៉ាទ័រ ដើម្បីជួយជីក និងបារសំរាម កំប្លោក ដីភក់ចេញពីក្នុងប្រឡាយ។

លោក មូល វីរះ បានបន្ថែមថា ក្រោយការស្តារនេះនឹងជួយរំដោះទឹកដែលលិចចេញពីសាលាបឋមសិក្សា និងវិទ្យាល័យឬស្សីកែវ ដោយមានប្រសិទ្ធភាព ហើយក៏ជួយកាត់បន្ថយបញ្ហាទឹកជំនន់ នៅក្នុងមូលដ្ឋានសង្កាត់ឬស្សីកែវ និងជួយឱ្យទឹកអាចហូរចេញពីប្រព័ន្ធលូមួយចំនួន ដែលមានការជាប់នឹងតំបន់សង្កាត់គីឡូម៉ែត្រលេខ៦ផងដែរ។

លោក សាយ សុវណ្ណារ៉ា ប្រជាពលរដ្ឋក្នុងភូមិមិត្តភាព បានអោយដឹងថា កាលពីកន្លងទៅ ទឹកបានជន់លិចសាលារៀន និងផ្លូវធ្វើដំណើរជារឿយៗ តែឥឡូវឃើញថា ទឹកហូរចេញបានល្អហើយ យើងសូមអរគុណចំពោះលោកចៅសង្កាត់ និងសប្បុរសជន ដែលបានយកចិត្តទុកដាក់ជួយសហគមន៍។ លោកបានបន្តថា នេះបង្ហាញពីការសហការយ៉ាងល្អរវាងអាជ្ញាធរសង្កាត់ មេភូមិ និងប្រជាពលរដ្ឋ ក្នុងការរួមចំណែកអភិវឌ្ឍសហគមន៍ ដើម្បីបង្កើនគុណភាព និងសុវត្ថិភាពសាធារណៈក្នុងតំបន់៕

អត្ថបទ៖ សំណាង