ផ្ទុះការវែកញែកចំពោះបវរកញ្ញាកម្ពុជា សុធីតា ដោយគ្រាន់តែបង្ហាញខ្លួននៅវៀតណាម និងនិយាយភាសាគេ

អតីតម្ចាស់មកុដ Miss Grand Cambodia 2021 កញ្ញា ប៉ូ គីមថេងសុធីតា បានក្លាយជាប្រធានបទគេវែកញែកលើបណ្តាញសង្គម បន្ទាប់ពីកញ្ញាបានបង្ហោះវីដេអូមួយបង្ហាញថា កំពុងស្ថិតនៅទីក្រុង Ho Chi Minh City (Saigon) ហើយនិយាយជាភាសាវៀតណាមយ៉ាងរលូន។

យ៉ាងណាមិញ ក្រោយពេលបង្ហោះវីដេអូនេះ បានធ្វើឱ្យសាធារណជនមួយចំនួនបញ្ចេញមតិមិនពេញចិត្តផងដែរ និងវាយតម្លៃតែផ្តាសថែមទៀត។ ទោះជាយ៉ាងណា មតិមួយចំនួនផ្សេងទៀតពីអ្នកគាំទ្រ ក៏បានលើកឡើងថា ការនិយាយភាសាវៀតណាមអាចជាយុទ្ធសាស្ត្រក្នុងការពង្រីកទីផ្សារ និងទាក់ទាញអ្នកគាំទ្រថ្មីៗ ជាពិសេសប្រសិនបើបវរកញ្ញារូបនេះ មានគម្រោងចូលរួមកម្មវិធីប្រកួតអន្តរជាតិ ឬកម្មវិធីដែលពាក់ព័ន្ធនឹងប្រទេសវៀតណាម។

អ្នកគាំទ្រមួយចំនួនក៏បានបន្ថែមថា ការចេះភាសាច្រើនគឺជាគុណសម្បត្តិ មិនមែនជាកំហុសនោះទេ ហើយការបង្ហាញខ្លួនក្នុងបរិបទអន្តរជាតិ ត្រូវការភាពបត់បែន និងការសម្របខ្លួនតាមបរិយាកាស។

គួររំលឹកថា កាលពីពេលថ្មីៗនេះ កញ្ញា ប៉ូគីម ថេងសុធីតា បានប្រកាសសម្រេចចិត្តមិនបន្តចូលរួមការប្រកួតបវរកញ្ញាទៀតទេ ដោយនាងបង្ហាញថាចង់ផ្តោតលើជីវិតផ្ទាល់ខ្លួន និងការសាងសង់អនាគតគ្រួសារ។ ទោះជាយ៉ាងណា ការរស់នៅ និងសកម្មភាពរបស់នាងនៅតែទាក់ទាញការចាប់អារម្មណ៍ពីសាធារណជនជាបន្តបន្ទាប់៕ អត្ថបទ៖ ចាន់រ៉ា