ត្រាំ ប្រាប់​ថា អាមេរិក​ ប្រើភ្នែកទិព្វអវកាស យាមអ៊ុយរ៉ាញ៉ូម មិនឱ្យអ៊ីរ៉ង់ ចូល​ទៅ​ជិតបានឡើយ

លោកប្រធានាធិបតី ដូណាល់ ត្រាំ បានផ្ញើសារព្រមានយ៉ាងក្តៅគគុកជាថ្មីទៅកាន់ប្រទេសអ៊ីរ៉ង់ ដោយលើកឡើងថា សហរដ្ឋអាមេរិក កំពុងប្រើប្រាស់បច្ចេកវិទ្យាយោធាកម្រិតខ្ពស់ ដើម្បីតាមដាន​នូវ​រាល់ចលនា ក្បែរទីតាំងរក្សាទុកសារធាតុអ៊ុយរ៉ាញ៉ូមកម្រិតខ្ពស់របស់អ៊ីរ៉ង់។

សារព័ត៌មាន APA ចុះ​ផ្សាយ​ថ្ងៃទី​១១ ខែ​ឧសភា នេះ ​ថា លោក ត្រាំ បានបញ្ជាក់​ថា អាមេរិក នឹងមិនលើកលែងឱ្យនរណាម្នាក់ឡើយ ប្រសិនបើហ៊ានចូល​ទៅ​យក​ ឬ​ប៉ះពាល់វត្ថុធាតុដើមនុយក្លេអ៊ែរទាំងនោះ។

នៅក្នុងកិច្ចសម្ភាសន៍តាមកញ្ចក់ទូរទស្សន៍កាលពីថ្ងៃអាទិត្យ លោក ត្រាំ ហាក់មិនសូវមានការព្រួយបារម្ភ ចំពោះវត្តមានអ៊ុយរ៉ាញ៉ូម ដែលនៅសេសសល់ក្នុងទឹកដីអ៊ីរ៉ង់នោះទេ បើទោះបីជាវាត្រូវបានគេជឿថា កំពុងកប់​នៅ​ក្រោមគំនរបាក់បែក នៃរោងចក្រនុយក្លេអ៊ែរ ដែលរងការវាយប្រហារកាល​ពីឆ្នាំ​មុន​ក៏ដោយ។ លោកបានថ្លែងដោយទំនុកចិត្តថា «យើង នឹងទៅយកវា នៅពេលណាមួយ ដែលយើងចង់បាន ព្រោះយើងបានដាក់វាឱ្យស្ថិត នៅក្រោមការតាមដានយ៉ាងដិតដល់​ជា​ទី​បំផុត»។

អ្វីដែលគួរឱ្យចាប់អារម្មណ៍នោះ លោក ត្រាំ បានលើកសរសើរពីសមត្ថភាពរបស់ «កងកម្លាំងអវកាស» (Space Force) ដែលលោកជាអ្នកបង្កើតឡើង ដោយលោកអះអាងថា កងកម្លាំងនេះ កំពុងឃ្លាំមើលពីលើអាកាស ២៤ ម៉ោងលើ ២៤ ម៉ោង ប្រៀប​ដូចជា​ភ្នែក​ទិព្វ​ពី​អវកាស​អ៊ីចឹង។ លោកបានបន្ថែមទាំងសម្តីបែបកំប្លែងលាយឡំភាពម៉ឺងម៉ាត់ថា បើមាននរណាម្នាក់ដើរចូលទៅជិតទីតាំងនោះ អាមេរិកមិនត្រឹមតែដឹងឡើយ ប៉ុន្តែថែមទាំងអាច​ស្គាល់​ដល់ឈ្មោះ អាសយដ្ឋាន និងលេខអត្តសញ្ញាណប័ណ្ណរបស់បុគ្គលនោះទៀតផង ហើយ​អាមេរិក នឹង​ «កម្ទេច» ពួកគេចោលតែម្តង៕

ប្រែសម្រួល៖ ឈាង