ឧកញ៉ា យឹម តាស្រង់ ដឹកនាំគ្រឿងឧបភោគ និងទុរេន ៥តោន ជូនដល់វីរកងទ័ព

ឧកញ៉ា យឹម តាស្រង់ និងភរិយា អ្នកស្រី លី ញូវរី បានផ្តួចផ្តើមទិញទុរេនខ្មែរ ដើម្បីចែកជូនដល់វីរកងទ័ពដែលកំពុងឈរជើងការពារបូរណភាពទឹកដីតាមតំបន់ព្រំដែន ដោយចំណាយថវិកា ១០,០០០ ដុល្លារ ខណៈលោក បូ ភ័ក្ត្រា ក៏បានចូលរួមថវិកាបន្ថែម ៥,០០០ ដុល្លារផងដែរ។

បើតាមការបញ្ជាក់ ទុរេនទាំងនេះត្រូវបានទិញពីចំការក្នុងស្រុកផ្ទាល់ ក្នុងភូមិសាស្ត្រកសិទេសចរណ៍ នៃតំបន់ទំនប់ប្រទាក់ក្រឡា ខេត្តកំពត ខណៈទុរេនសរុបទាំង ៥តោននេះ ក៏ត្រូវបានប្រគល់ដល់ដៃវីរកងទ័ពរួចហើយដែរក្នុងសប្តាហ៍នេះ។

ទន្ទឹមនឹងទឹកចិត្តចំពោះកងទ័ពនេះ អ្នកស្រី លី ញូវរី បានរៀបរាប់ថា នេះជាក្តីបំណងអ្នកស្រីតាំងពីរដូវកាលទុរេនឆ្នាំមុនមកម្ល៉េះ ប៉ុន្តែកាលណោះ ត្រូវខកខានដោយសារតែចំការនីមួយៗត្រូវបានឈ្មួញម៉ៅយកអស់។ តែយ៉ាងណានៅឆ្នាំនេះ អ្នកស្រីបានសម្រេចបំណងទិញទុរេនជូនដល់វីរកងទ័ពក្នុងចំនួនដ៏ច្រើន។ ក្នុងនោះ លោក បូ ភ័ក្ត្រា ក៏សម្តែងការអរគុណដល់ម្ចាស់ចំការទុរេនផងដែរ ដែលមានទឹកចិត្តចូលរួមចំណែកនេះ ដោយលក់ក្នុងតម្លៃត្រឹមតែ ១២០០០រៀល/១គីឡូប៉ុណ្ណោះ។

ក្នុងដំណើរនាំយកទុរេនដាំផ្ទាល់ដោយកសិករខ្មែរទាំង ៥តោន ទៅកាន់តំបន់ព្រំដែនចែកជូនដល់វីរកងទ័ព ក៏មានគ្រឿងឧបភោគបរិភោគផ្សេងទៀត រួមនិងថរិកាផ្ទាល់របស់ឧកញ៉ា យឹម តាស្រង់ និងភរិយា ថែមទៀតផង ខណៈទឹកចិត្តល្អប្រពៃនេះ ត្រូវបានមហាជនសម្តែងការកោតសរសើរផងដែរ៕ ដោយ ៖ ចាន់រ៉ា