ព័ត៌មានអន្ដរជាតិ

លោក ត្រាំ ចង់ចួបមេដឹកនាំកំពូលអ៊ីរ៉ង់ លោក Mojtaba Khamenei

បានផុស

១៦ វិនាទី មុន

នៅ

ថ្ងៃព្រហស្បតិ៍ ៤ មិថុនា ២០២៦

ដោយ

ខណៈទីក្រុងវ៉ាស៊ីនតោន និងទីក្រុងតេហេរ៉ង់ នៅតែបន្តចោទប្រកាន់គ្នាទៅវិញទៅមកថាបានរំលោភលើបទឈប់បាញ់ ប្រធានាធិបតីអាមេរិក លោក ដូណាល់ ត្រាំ កាលពីថ្ងៃពុធ បានសម្តែងក្តីសង្ឃឹមថានឹងបានជួបពិភាក្សាជាមួយមេដឹកនាំកំពូលអ៊ីរ៉ង់ លោក Mojtaba Khamenei ដែលមិនទាន់បង្ហាញខ្លួនជាសាធារណៈទាល់តែសោះ ចាប់តាំងពីឡើងកាន់តំណែងពីឪពុកមក។

ភ្នាក់ងារព័ត៌មាន AFP កាលពីថ្ងៃទី០៣ ខែមិថុនា បានផ្សាយថា លោក Mojtaba Khamenei វ័យ៥៦ឆ្នាំ បានបាត់មុខរហូតមក បន្ទាប់ពីរងរបួសក្នុងការវាយប្រហារទ្រង់ទ្រាយធំពីសំណាក់អាមេរិក-អ៊ីស្រាអែល កាលពីចុងខែកុម្ភៈ។

លោក ត្រាំ និយាយក្នុងផតខាស «Pod Force One» របស់កាសែត New York Post ថា៖ «ខ្ញុំចង់ជួបគាត់ ហើយពួកយើងប្រហែលជានឹងជួបគ្នា នៅពេលណាមួយ អាស្រ័យទៅលើការវិវឌ្ឍជាក់ស្តែងនៃស្ថានភាពទាំងមូល»។

ប្រធានាធិបតីសហរដ្ឋអាមេរិក លោក ដូណាល់ ត្រាំ ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពេលអ្នកកាសែត សួរអំពីសុខភាពមេដឹកនាំកំពូលអ៊ីរ៉ង់ និងការពាក់ព័ន្ធនៃសង្រ្គាមបច្ចុប្បន្ន លោក ត្រាំ បន្ថែមថា៖ « លោក Khamenei ពិតជាមានជាប់ពាក់ព័ន្ធ។ ពួកគេ[ភាគីអ៊ីរ៉ង់] និយាយថា គាត់កំពុងផ្តល់ការសម្រេចចិត្តនានា»។

ដោយឡែក រដ្ឋមន្ត្រីការបរទេសអាមេរិក លោក Marco Rubio ប្រាប់គណៈកម្មាធិការសភាកាលពីថ្ងៃអង្គារថា លោក Mojtaba Khamenei នៅមានជីវិត និងកាន់តែសកម្មទៀតផង។

លោក Rubio ថា៖ « ខ្ញុំគិតថាមានការចង្អុលបង្ហាញនៅទីនោះ វត្តមានគាត់កំពុងចូលរួមកាន់តែខ្លាំង នៅកម្រិតណាមួយ»។

គួរបញ្ជាក់ថា ការវាយប្រហាររបស់អ៊ីរ៉ង់កាលពីថ្ងៃពុធលើអាកាសយានដ្ឋានគុយវ៉ែត បានក្លាយជាការសាកល្បងដ៏ធ្ងន់ធ្ងរបំផុតមួយទៅលើកិច្ចព្រមព្រៀងបទឈប់បាញ់ដ៏ផុយស្រួយ កាលពីថ្ងៃទី៨ ខែមេសា។

ឆ្មាំបដិវត្តន៍អ៊ីរ៉ង់អះអាងពីការវាយប្រហារនេះជាការសងសឹក ចំពោះការវាយប្រហាររបស់សហរដ្ឋអាមេរិកលើនាវាដឹកប្រេង និងកោះអ៊ីរ៉ង់៕

សម្រួល៖ ណឺ មិនា