កុងហ្គោ​ រឹត​មិន​ស្រួល​ ដោយ​ ត្រឹម​២៤​ម៉ោង ​មាន​មនុស្ស​ឆ្លង​ជំងឺ​អេបូឡា​ ដល់​ទៅ​ ៧១ករណី​

ស្ថានការណ៍រាតត្បាតជំងឺអេបូឡា នៅសាធារណរដ្ឋប្រជាធិបតេយ្យកុងហ្គោ រឹតតែមិនស្រួលទៅៗហើយ ដោយត្រឹមរយៈពេល ២៤ម៉ោងចុងក្រោយ ការឆ្លងគឺមានកម្រិតធ្ងន់ធ្ងរមែនទែន ពោលគឺ មនុស្សរហូតដល់ ៧១នាក់ ត្រូវបានធ្វើតេស្តវិជ្ជមាន ជំងឺដ៏កាចសាហាវនេះ។

តាមការផ្សាយរបស់ Reuters ដោយដកស្រង់សេចក្តីប្រកាស របស់ក្រសួងសុខាភិបាលកុងហ្គោ កាលពីថ្ងៃសៅរ៍ ទី៥ ខែមិថុនា ឆ្នាំ២០២៦, ត្រឹមមួយថ្ងៃគត់ ក្រសួងបានរកឃើញអ្នកឆ្លងថ្មី ចំនួន ៧១នាក់ ដែលនេះគឺជាហានិភ័យដ៏ខ្លាំងមួយ ឈានដល់ការព្រមានអំពីការឆ្លងរាលដាល ក្នុងសហគមន៍ក្នុងល្បឿនដ៏លឿនមិននឹកស្មានដល់ បង្កក្តីបារម្ភជាទីបំផុត។

បូករួមទាំងការរកឃើញថ្មីនេះទៀត ករណីឆ្លងជំងឺអេបូឡា ដែលកុងហ្គោ បានចងក្រងជាផ្លូវការ គឺមានចំនួនសរុប ៤៥២ករណី ខណៈ ៨២នាក់ទៀត ស្លាប់។

សូមជម្រាបជាថ្មី ជំងឺអេបូឡា ដែលកំពុងផ្ទុះខ្លាំងនៅកុងហ្គោ នាពេលបច្ចុប្បន្ន គឺបង្កឡើងដោយវីរុសប្រភេទកម្រ ឈ្មោះ ​Bundibugyo ដែលគ្មានវ៉ាក់សាំងណាកម្ចាត់បាន និងមានសមត្ថភាព សម្លាប់ ១ភាគ៣ នៃអ្នកដែលឆ្លង។

វាឆ្លងពីសត្វមកមនុស្ស តាមរយៈការប៉ះពាល់ផ្ទាល់ជាមួយឈាម សារធាតុរាវ ឬសរីរាង្គនៃសត្វព្រៃ ដែលផ្ទុកមេរោគ ដូចជា ប្រចៀវ ស្វា ឬសត្វឈ្លូស។ ចំណែក ការឆ្លងពីមនុស្សទៅមនុស្ស គឺឆ្លងតាមរយៈការប៉ះពាល់ផ្ទាល់ជាមួយ ឈាម ឬសារធាតុរាវរាងកាយ ដូចជាទឹកមាត់របស់អ្នកជំងឺ ឬអ្នកដែលស្លាប់ ដោយសារ អេបូឡា។

រោគសញ្ញារបស់វា មានដូចជា គ្រុនក្តៅខ្លាំង អស់កម្លាំងខ្លាំង ឈឺសាច់ដុំ ឈឺក្បាល និងឈឺបំពង់ក។ ដំណាក់កាលធ្ងន់ធ្ងរ វាបណ្តាលឲ្យក្អួត រាករូស មានកន្ទួលលើស្បែក ខូចតម្រងនោម និងថ្លើមចុះខ្សោយ។ ក្នុងករណីខ្លះ មានទាំងហូរឈាម តាមអញ្ចាញធ្មេញ លាមក ឬស្បែកទៀតផង៕

អត្ថបទ៖ សុខ សុវណ្ណ