ថៃ ត្រៀមចាក់វ៉ាក់សាំង Sinovac ដល់ពលរដ្ឋដែលមានអាយុ ៦០ ឆ្នាំឡើងទៅ

ឧបនាយករដ្ឋមន្រ្តី និងជារដ្ឋមន្រ្តីសុខភាពសាធារណៈថៃលោក Anutin Charnvirakul បាននិយាយកាលពីថ្ងៃសុក្រថា ប្រទេសថៃនឹងចាប់ផ្តើមចាក់វ៉ាក់សាំង Sinovac របស់ក្រុមហ៊ុនជីវវិទ្យាសាស្ត្ររបស់ប្រទេសចិន ដល់មនុស្សចាស់ដែលមានអាយុ ៦០ ឆ្នាំឡើងទៅ ។

លោក Anutin បានធ្វើការប្រកាសនៅក្នុងសន្និសីទកាសែត បន្ទាប់ពីគណៈកម្មាធិការជាតិប្រយុទ្ធនឹងជំងឺឆ្លង បានអនុម័តការប្រើប្រាស់វ៉ាក់សាំងចិន លើមនុស្សដែលមានអាយុ ៦០ ឆ្នាំឡើងទៅនៅក្នុងប្រទេស ៕

លោកបាននិយាយថា រដ្ឋាភិបាលគ្រោងនឹងចាក់វ៉ាក់សាំងការពារជំងឺកូវីដ ១៩ ចំនួន ២.៥ លានដូសក្នុងខែនេះ ហើយបានរៀបចំទីតាំងចាក់វ៉ាក់សាំងចំនួន ៨២ កន្លែងនៅរដ្ឋធានីបាងកក និងប្រហែល ៣០០ កន្លែងនៅតាមបណ្ដាខេត្តផ្សេងទៀត ។

សេចក្តីប្រកាសនេះបានធ្វើឡើង នៅពេលដែលប្រទេសថៃបានប្រឈមនឹងការផ្ទុះឡើងនូវជំងឺកូវីដ ១៩ ដ៏ធ្ងន់ធ្ងរបំផុត ចាប់តាំងពីរោគរាតត្បាតនេះបានចាប់ផ្ដើម ។

ប្រទេសអាស៊ីអាគ្នេយ៍មួយនេះ បានចាប់ផ្តើមកម្មវិធីចាក់វ៉ាក់សាំងថ្នាក់ជាតិរបស់ខ្លួន នៅក្នុងខែកុម្ភៈហើយមានគោលបំណងចាក់ប្រមាណ ៧០ ភាគរយនៃប្រជាជនជិត ៧០ លាននាក់របស់ខ្លួន មុនដំណាច់ឆ្នាំនេះ ។

គួរបញ្ជាក់ថា គិតត្រឹមពេលនេះប្រទេសថៃមានករណីឆ្លងជំងឺកូវីដ ១៩ សរុប ៨១,២៧៤ ករណី និងមានអ្នកស្លាប់ចំនួន ៣៨២ នាក់ ខណៈមានអ្នកជាសះស្បើយ ៥១,៤១៩ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ ទីបំផុត WHO ទទួលស្គាល់ថា វ៉ាក់សាំង Sinovac ពិតជាមានប្រសិទ្ធភាពមែន!

ចុចអាន ៖ អឺរ៉ុប ត្រៀមអនុម័តប្រើប្រាស់វ៉ាក់សាំង Sinovac របស់ចិន ក្រោយវាយតម្លៃពីប្រសិទ្ធភាព និងសុវត្ថិភាព