ទីបំផុត WHO ទទួលស្គាល់ថា វ៉ាក់សាំង Sinovac ពិតជាមានប្រសិទ្ធភាពមែន!

អ្នកជំនាញអង្គការសុខភាពពិភពលោកបានរកឃើញថា វ៉ាក់សាំងការពារជំងឺកូវីដ-១៩ ដែលផលិតដោយក្រុមហ៊ុន Sinovac Biotech របស់ប្រទេសចិន ពិតជាមានប្រសិទ្ធភាពក្នុងការទប់ស្កាត់ជំងឺកូវីដ-១៩ចំពោះមនុស្សពេញវ័យអាយុក្រោម៦០ឆ្នាំពិតមែន ប៉ុន្តែនៅខ្វះទិន្នន័យគុណភាព ស្តីពីហានិភ័យនៃផលប៉ះពាល់ធ្ងន់ធ្ងរ។

ស្ថាប័នជំនាញខាងប្រឹក្សាយុទ្ធសាស្ត្រ (SAGE) របស់ WHO បានពិនិត្យវ៉ាក់សាំង CoronaVac របស់ក្រុមហ៊ុន Sinovac ពីការសាកល្បងដំណាក់កាលទី៣នៅក្នុងប្រទេសចិន ប្រេស៊ីល ឥណ្ឌូណេស៊ី ទួរគីនិងឈីលី។

ការវាយតម្លៃនេះ ធ្វើឡើងភ្លាមៗបន្ទាប់ពីក្រុមអ្នកជំនាញរបស់ SAGE បានបង្ហាញពីទំនុកចិត្តទាប ចំពោះទិន្នន័យដែលផ្តល់ដោយក្រុមហ៊ុនផលិតឱសថចិនមួយទៀតឈ្មោះ Sinopharm លើវ៉ាក់សាំងកូវីដរបស់ខ្លួន ទាក់ទងនឹងហានិភ័យនៃផលប៉ះពាល់ធ្ងន់ធ្ងរចំពោះអ្នកជំងឺមួយចំនួន ប៉ុន្តែមានជំនឿចិត្តទៅលើសមត្ថភាពរបស់វ៉ាក់សាំងនេះក្នុងការការពារការឆ្លងរោគ។

SAGE បាននិយាយនៅក្នុងការវាយតម្លៃមួយ ដែលត្រូវបានផ្សព្វផ្សាយលើគេហទំព័ររបស់ WHO ថា “យើងមានទំនុកចិត្តថា វ៉ាក់សាំង CoronaVac ចំនួន២ដូស គឺមានប្រសិទ្ធភាពខ្ពស់ក្នុងការការពារជំងឺកូវីដ-១៩ ចំពោះមនុស្សពេញវ័យអាយុចាប់ពី១៨ដល់៥៩ឆ្នាំ។

SAGE បានលើកឡើងពីគម្លាតភស្តុតាងនៃសុវត្ថិភាពក្នុងការមានផ្ទៃពោះ និងសុវត្ថិភាពការពារចំពោះមនុស្សវ័យចំណាស់ អ្នកដែលមានជំងឺរ៉ាំរ៉ៃនិងការវាយតម្លៃករណីមានប្រតិកម្ម។

គួរបញ្ជាក់ថា វ៉ាក់សាំង Sinovac ត្រូវបានអនុញ្ញាតឲ្យប្រើប្រាស់នៅក្នុងប្រទេសចំនួន៣២ហើយ ជាមួយនឹងការចែកចាយចំនួន២៦០លានដូស៕

ប្រែសម្រួលដោយ៖ Vann Vann

ប្រភព៖ Al Jazeera

ចុចអាន៖ វ៉ាក់សាំងក្រុមហ៊ុនមួយ បង្កើនភាពស៊ាំប្រឆាំងវីរុសកូវីដ-១៩បំប្លែងខ្លួន តែត្រូវចាក់ខុសពីធម្មតា