កីឡា

ធ្លាប់ផ្តួល ចាន់ រតនា Xie Wei ប៉ះឥណ្ឌាល្ងាចនេះ ដើម្បីឱកាសខ្សែក្រវាត់ពិភពលោក

បានផុស

៤ years មុន

នៅ

ថ្ងៃសុក្រ ២៨ ឧសភា ២០២១

ដោយ

អ្នកលេងគុនចម្រុះចិន Xie Wei បានប្តេជ្ញាយកឈ្នះកីឡាករឥណ្ឌា Kantharaj Agasa ឲ្យបានសម្រាប់ការប្រកួតល្ងាចថ្ងៃសុក្រនេះនៅព្រឹត្តិការណ៍ ONE: FULL BLAST ដើម្បីបន្តបោះជំហានទៅរកឱកាសប្រកួតដណ្តើមខ្សែក្រវាត់ពិភពលោក ONE Flyweight។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Xie Wei ដែលធ្លាប់ផ្តួលជើងខ្លាំងគុនចម្រុះលេខ១កម្ពុជា ចាន់ រតនា បាននិយាយថា ៖«ជាគូប្រជែងធម្មតាម្នាក់មើលមិនឃើញពីផែនការរបស់ខ្ញុំទេ»។

ចាប់តាំងពីប្រឡូកប្រដាល់នៅ ONE Hero Series កាលពីមករា ឆ្នាំ២០១៩មក រូបគេបានក្លាយជាកីឡាករកំពុងលេចធ្លោម្នាក់នៅសង្វៀនប្រដាល់ពិភពលោកនេះ។ រូបគេធ្លាប់បានផ្តួលដៃគូឲ្យសន្លប់៤លើកជាប់គ្នា មុនពេលចាញ់ពិន្ទុជើងខ្លាំង Danny Kingad កាលពីខែមករា ឆ្នាំ២០២០។ ប៉ុន្តែរូបគេបានបង្កភ្ញាក់ផ្អើលយ៉ាងខ្លាំងនៅពេលផ្តួលជើងខ្លាំងកម្ពុជា ចាន់ រតនា ក្នុងទឹកទី៣។

រាត្រីថ្ងៃសុក្រនេះ រូបគេប្តេជ្ញាធ្វើឲ្យបានជោគជ័យលើកីឡាករឥណ្ឌាដែលមានជំនាញចំបាប់ ប៉ុន្តែទើបតែលេចមុខប្រកួតលើកដំបូងនៅ ONEគឺ Agasa។

Xie បាននិយាយថា ៖«ខ្ញុំនឹងទទួលបានជ័យជម្នះជាប់គ្នាភ្លាមៗ។ នៅពេលខាងមុខ ខ្ញុំនឹងក្លាយជាកីឡាករចិនទី១ឈ្នះជើងឯកពិភពលោក»។ សព្វថ្ងៃនៅ កីឡាការិនី Xiong Jing Nan ជាជនជាតិចិនទី១ដែលបានក្លាយជើងឯកគុនចម្រុះពិភពលោក ប៉ុន្តែមិនទាន់មានអ្នកកីឡាបុរសឈ្នះនៅឡើយទេ។ «ខ្ញុំបានឆ្លងកាត់ដៃគូខ្លាំងៗច្រើនមកហើយ ដូចជា Danny Kingad និង ចាន់ រតនា ជាដើម ដូច្នេះថ្ងៃសុក្រនេះ ខ្ញុំជឿជាក់ថា ខ្ញុំនឹងឈ្នះការប្រកួត។ ប៉ុន្តែនេះ ប្រវត្តិសាស្ត្រទើបតែចាប់ផ្តើមប៉ុណ្ណោះ»៕

Related Topics:កីឡាប្រដាល់