ផ្ទះ១៤ខ្នងរងការខូចខាតដោយ​សារខ្យល់កន្ត្រាក់នៅ ស្រុកសាមគ្គីមានជ័យ

ផ្ទះប្រជាពលរដ្ឋ ១៤ខ្នងផ្ទះបានរងការខូចខាតដោយសារគ្រោះធម្មជាតិខ្យល់កន្ត្រាក់ នៅវេលាម៉ោង៤ល្ងាចថ្ងៃថ្ងទី៤ ខែមិថុនា ឆ្នាំ២០២១ នៅក្នុងភូមិក្រាំងស្រម៉ និងភូមិត្រពាំងទន្លាប់ ស្ថិតនៅក្នុងឃុំស្វាយជុកស្រុកសាមគ្គីមានជ័យ ខេត្តកំពង់ឆ្នាំង។

លោកអធិការនគបាលស្រុកសាមគ្គីមានជយ័ បានឱ្យដឹងនៅព្រឹកថ្ងៃទី៥ ខែមិថុនា នេះថាករណីគ្រោះធម្មជាតិខាងលើនេះបណ្តាលឱ្យប៉ើងដំបូលអស់ផ្ទះ ១៤ខ្នង និងផ្ទះ១ខ្នង មានទំហំ ៧ម៉ែត្រគុណ ៨ម៉ែត្រ បានរងការខូចរលំដួលទាំង​ស្រុង និងផ្ទះ១ខ្នងផ្សេងទៀតទំហំ ៥ម៉ែត្រ គុណ និង៦ម៉ែត្រនិង១ខ្នង ទៀតទំហំ ៤ម៉ែត្រគុណនិង៥ម៉ែត្រ ត្រូវបានប៉ើងចេញពីជើងសសរ ធ្លាក់មកដី។ ប៉ុន្តែនៅក្នុងហេតុការខាងលើនេះមិនបណ្តាលឱ្យមនុស្សឬសត្វរងគ្រោះថ្នាក់នោះឡើយ។

ដោយឡែកលោក ប្រាក់ សោភ័ណ្ឌ នាយកប្រតិបត្តសាខាកាកបាទក្រហមខេត្តកំពង់ឆ្នាំង បានឱ្យដឹងថា ទីណាមានគ្រោះមហន្តរាយនិងគ្រោះធម្មជាតិ សាខាកាកបាទក្រហមខេត្ត និងចុះដល់ទីកន្លែងនាំយកជាគ្រឿងសម្ភារផ្សេងៗទៅចែកជូនជនរងគ្រោះ ដើម្បីឆ្លើយតបបន្ទា ន់ដល់ពួកផងដែរ៕

អត្ថបទ៖ ឈៀងថារិទ្ធ