រុស្ស៊ី គំរាមបាញ់កម្ទេចក្បួនរថយន្តដឹកអាវុធលោកខាងលិច នៅ អ៊ុយក្រែន (មានវីដេអូ)

ប្រទេសរុស្ស៊ីបាននិយាយថា កងទ័ពរបស់ខ្លួន អាចកំណត់គោលដៅ លើក្បួនផ្គត់ផ្គង់សព្វាវុធរបស់លោកខាងលិចនៅក្នុងប្រទេសអ៊ុយក្រែន។

អនុរដ្ឋមន្ត្រីការបរទេសរុស្ស៊ី លោក Sergei Ryabkov បានប្រាប់ទូរទស្សន៍រដ្ឋកាលពីថ្ងៃសៅរ៍ទី១២ខែមីនាថា “យើងបានព្រមានសហរដ្ឋអាមេរិកថា ការរៀបចំដឹកអាវុធពីប្រទេសមួយចំនួន មិនមែនត្រឹមតែជាសកម្មភាពដ៏គ្រោះថ្នាក់ប៉ុណ្ណោះទេ វាក៏ជាសកម្មភាពដែលប្រែក្លាយក្បួនរថយន្តទាំងនេះ ទៅជាគោលដៅស្របច្បាប់សម្រាប់វាយប្រហារផងដែរ”។

លោកនិយាយថា ទីក្រុងមូស្គូបានព្រមានអំពីផលវិបាកនៃការផ្ទេរអាវុធដោយមិនចេះគិតទៅឲ្យអ៊ុយក្រែន ដូចជាប្រព័ន្ធការពារដែនអាកាស ប្រព័ន្ធមីស៊ីលប្រឆាំងរថក្រោះ និងអាវុធផ្សេងៗទៀតផងដែរ។

លោក Ryabkov បន្តថា ទីក្រុងវ៉ាស៊ីនតោនមិនបានយកចិត្តទុកដាក់ចំពោះការព្រមានរបស់ទីក្រុងមូស្គូនោះទេ។ រុស្ស៊ី និងសហរដ្ឋអាមេរិកថែមទាំងមិនបានរៀបចំដំណើរការចរចាណាមួយ លើអ៊ុយបញ្ហាក្រែនផងដែរ។

គួរបញ្ជាក់ថា ប្រធានាធិបតីអ៊ុយក្រែន លោក Volodymyr Zelenskyy បានអំពាវនាវម្តងហើយម្តងទៀត ដល់មហាអំណាចលោកខាងលិច ឲ្យផ្តល់ជំនួយយោធាបន្ថែមទៀត ដល់ប្រទេសរបស់លោក ដោយព្រមានថា យោធារបស់រុស្ស៊ី នឹងមិនឈប់នៅត្រឹមព្រំដែនអ៊ុយក្រែនប៉ុណ្ណោះទេ ប្រសិនបើទីក្រុងមូស្គូ ដណ្តើមបានការគ្រប់គ្រងពេញលេញ។

ថ្វីបើសហរដ្ឋអាមេរិក និងអង្គការណាតូ បានច្រានចោលការអំពាវនាវម្តងហើយម្តងទៀតរបស់លោក Zelenskyy ដើម្បីដាក់តំបន់គ្មានការហោះហើរលើអ៊ុយក្រែនក៏ដោយ ប៉ុន្តែពួកគេកំពុងដឹកជញ្ជូនសព្វាវុធចូលទៅក្នុងប្រទេសអ៊ុយក្រែន ក្នុងល្បឿនដ៏លឿន រួមទាំងអាវុធដែលមានភាពរសើបខ្លាំងដូចជា មីស៊ីលបាញ់លើស្មា MANPADS ដែលអាចទម្លាក់យន្តហោះបានផងដែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Al Jazeera

ចុចអាន៖ ណាតូ គំរាមឆ្លើយតប ប្រើកម្លាំងពេញទំហឹង បើរុស្ស៊ីហ៊ានវាយប្រហារទឹកដីរបស់ខ្លួន