រុស្ស៊ី បាញ់មីស៊ីលកម្ទេចប្រព័ន្ធខែលការពារដែនអាកាសដែល អឺរ៉ុប ទើបបញ្ជូនទៅ អ៊ុយក្រែន

ប្រទេសរុស្ស៊ីនិយាយនៅថ្ងៃចន្ទនេះថាបានបំផ្លាញប្រព័ន្ធការពារដែនអាកាស S-300 ដែលទើបតែបញ្ជូនទៅកាន់ប្រទេសអ៊ុយក្រែនដោយប្រទេសអឺរ៉ុបមួយនៅជិតទីក្រុង Dnipro ភាគកណ្ដាល ។

អ្នកនាំពាក្យក្រសួងការពារជាតិរុស្ស៊ីលោក Igor Konashenkov បាននិយាយនៅក្នុងសន្និសីទសារព័ត៌មានប្រចាំថ្ងៃនៅទីក្រុងមូស្គូថា “កាលពីថ្ងៃអាទិត្យទី ១០ ខែមេសានៅភាគខាងត្បូងនៃទីក្រុង Dnepropetrovsk, មីស៊ីលល្បឿនលឿនជាងសំឡេង Kalibr របស់រុស្ស៊ីបានបាញ់កម្ទេចប្រព័ន្ធខែលការពារដែនអាកាស S-300 ដែលលាក់នៅក្នុងឃ្លាំងមួយ បន្ទាប់ពីទីក្រុងកៀវទើបតែទទួលបានពីប្រទេសមួយរបស់សហភាពអឺរ៉ុប” ។

លោក Konashenkov បានបន្ថែមថា ប្រព័ន្ធខែលការពារដែនអាកាស S-300 ចំនួន ៤ គ្រឿង និងបុគ្គលិករហូតដល់ ២៥ នាក់នៃកងកម្លាំងប្រដាប់អាវុធអ៊ុយក្រែន ក៏ត្រូវបានវាយប្រហារផងដែរ ។

លោកបាននិយាយថា លើសពីនេះ ទីតាំងជួសជុលមួយកន្លែងដែលមានប្រព័ន្ធការពារដែនអាកាសចំនួន ២ គឺ Buk-M1 និង Osa AKM នៅជិតការតាំងទីលំនៅ Velyka Novosilka ក្នុងទីក្រុង Donetsk ក៏ត្រូវបានវាយប្រហារដោយមីស៊ីលផងដែរ ។

អ្នក​នាំពាក្យ​រូប​នេះ​បាន​បន្ត​ថា បន្ថែម​ពី​លើ​នេះ ឃ្លាំង​ផ្ទុក​គ្រាប់​រំសេវ​ ២ កន្លែង រ៉ាដា S-300 មួយ រថក្រោះ ៩ គ្រឿង កាំភ្លើង​ធំ​ ៥ ដើម គ្រាប់​រ៉ុកកែត ៥ គ្រាប់ និង​អ្នក​ជាតិ​និយម​ជាង ៦០ ក៏​ត្រូវ​បាន​បំផ្លាញផងដែរ​កាល​ពីយប់ថ្ងៃអាទិត្យ ។

ជាចុងក្រោយលោក Konashenkov បាននិយាយថា ប្រព័ន្ធការពារដែនអាកាសរបស់រុស្ស៊ីបានបាញ់ទម្លាក់យន្តហោះចម្បាំង S-25 ចំនួន ២ គ្រឿង និងយន្តហោះគ្មានមនុស្សបើកចំនួន ៤ គ្រឿង ខណៈដែលឧទ្ធម្ភាគចក្រ Mi-24 របស់អ៊ុយក្រែនក៏ត្រូវបានបាញ់ទម្លាក់ដោយអាវុធធុនតូផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ រុស្ស៊ី បញ្ចេញវីដេអូបាញ់មីស៊ីលផ្លោង Iskander ចំគោលដៅនៅ អ៊ុយក្រែន