គ្រូព្រះខ័នរាជស្វាយរៀង៖ ជុំវិញការដាក់កីឡាករ U22 ឲ្យលេងលីគ ដើម្បីគោលដៅស៊ីហ្គេម

ពានរង្វាន់ខេមបូឌានព្រីមៀរលីគ រដូវកាល២០២២ បានធ្វើកំណែទម្រង់ថ្មី ជាមួយនឹងលក្ខខណ្ឌតម្រូវឲ្យក្លិបទាំងអស់ក្នុងការប្រកួតនីមួយៗដាក់បញ្ចូលកីឡាករអាយុក្រោម ២២ឆ្នាំ (អាយុត្រូវនឹងស៊ីហ្គេម២០២៣) ២នាក់បង្ហាញខ្លួននៅជម្រើស ១១នាក់ដំបូង ហើយលេងក្នុងរយៈពេល ៩០នាទី ដើម្បីឲ្យកីឡាករយុវជនទាំងនោះមានឱកាសលេងបានច្រើន ធ្វើយ៉ាងណាអាចមានសមត្ថភាពគ្រប់គ្រាន់លេងស៊ីហ្គេម។

មានការយល់ឃើញផ្សេងៗគ្នាក្នុងករណីនេះគ្រាដែល គ្រូបង្វឹកនៃក្លិបព្រះខ័នរាជស្វាយរៀង លោក Conor Nestor បានសង្កត់ធ្ងន់ថា ការដាក់ឲ្យកីឡាករអាយុក្រោម ២២ឆ្នាំចូលលេងក្នុងលីគដោយតម្រូវទៅតាមលក្ខខណ្ឌ គឺជារឿងដែលគ្រោះថ្នាក់។

លោក Conor Nestor បានប្រាប់កម្ពុជាថ្មី ដុចូនេះថា៖ «សម្រាប់ខ្ញុំ ប្រសិនបើកីឡាករលេងដោយសារតែពួកគេត្រូវលេងតាមលក្ខខណ្ឌ និងមិនមែនដោយសារតែពួកគេគួរទទួលបានវាតាមរយៈទម្រង់លេងល្អរបស់គេ នោះគឺជារឿងដ៏គ្រោះថ្នាក់ដល់ការអភិវឌ្ឍន៍របស់ពួកគេ»។ 

«ជាការពិតណាស់ កីឡាករវ័យក្មេងដែលមិនសូវបានលេង គឺប៉ះពាល់ដល់ការអភិវឌ្ឍ នេះជាការពិត។ ប៉ុន្តែពេលខ្លះការវិវឌ្ឍន៍កើតចេញពីការប្រឹងប្រែងដោយផ្ទាល់ដើម្បីបំពេញតួនាទីបានល្អជាងមិត្តរួមក្រុម។ ប្រសិនបើអ្នកមិនមានការប្រឹងប្រែង អ្នកប្រថុយនឹងបង្កើតទម្លាប់អាក្រក់ក្នុងវិជ្ជាជីវៈរបស់កីឡាករវ័យក្មេងរបស់យើង»។ គ្រូបង្វឹកសញ្ជាតិអៀរឡង់បានបន្ថែម។

ដោយឡែកនិយាយពីក្រុមរបស់លោកវិញ លោកបានឲ្យដឹងថា ក្លិបព្រះខ័នរាជស្វាយរៀង បានដាក់កីឡាករអាយុក្រោម ២២ឆ្នាំឲ្យចូលលេងតាំងពីរដូវកាលកាលមុនមកម៉្លេះ ខណៈឥលូវនេះពួកគេអាចជំនួសគ្នាបាន។

«កាលពីឆ្នាំមុន យើងជាក្លិបតែមួយគត់ដែលដាក់កីឡាករអាយុក្រោម ២២ឆ្នាំ ៥នាក់ ក្នុង ១០ប្រកួត ឬច្រើនជាងនេះ។ ដូច្នេះហើយ វាបានផ្តល់ឲ្យយើងនូវទំនុកចិត្តក្នុងការផ្លាស់ប្ដូរកីឡាករវ័យក្មេងរបស់យើងនៅឆ្នាំនេះ»។ សម្ដីរបស់លោក Conor Nestor។

គួរបញ្ជាក់ថា ដោយសារតែព្រឹត្តិការណ៍កីឡាអាស៊ីអាគ្នេយ៍ លើកទី៣២ នៅកម្ពុជា កាន់តែកៀកចូលមកដល់ សហព័ន្ធកីឡាបាល់ទាត់កម្ពុជា ក៏ដូចជាក្រុមហ៊ុនខេមបូឌានព្រីមៀរលីគ បានកំណត់លក្ខខណ្ឌតម្រូវឲ្យក្លិបទាំងអស់ដាក់បញ្ចូលកីឡាករអាយុក្រោម ២២ឆ្នាំ (អាយុត្រូវនឹងការប្រកួតស៊ីហ្គេម ឆ្នាំ២០២៣) ២នាក់បង្ហាញខ្លួននៅជម្រើស ១១នាក់ដំបូងក្នុងការប្រកួតនីមួយៗ ហើយត្រូវលេងក្នុងរយៈពេលពេញ ៩០នាទី និងអាចផ្លាស់ប្ដូរកីឡាករបាន តែនៅតែជាកីឡាករអាយុក្រោម ២២ឆ្នាំដដែល៕

អត្ថបទ៖ មន្នីរ័ត្ន