ម៉ូដស្បែកជើង​កញ្ចាស់ប្រេនមួយ តម្លៃលក់ជិត២ពាន់ដុល្លារ រកទិញសឹងមិនបានពាក់

ម៉ូដស្បែកជើងកញ្ចាស់ៗរបស់ម៉ាកយីហោ Balenciaga នឹងធ្វើឱ្យមនុស្សមួយចំនួនមានអារម្មណ៍មិនអាចទទួលយកបាន ព្រោះម៉ូដរបស់វាហាក់ប្រើអស់ ៣០ឆ្នាំទៅហើយ ប៉ុន្តែតម្លៃវិញខ្ពស់កប់ក្ដោង សឹងថាមានលុយហើយ រកទិញមិនបានផង។

ម៉ូដស្បែកជើងដែលគ្រប់គ្នាគិតថា ជាស្បែកជើងចាស់ ប្រើអស់ជាច្រើនឆ្នាំ ហើយថែមទាំងត្រូវម្ចាស់បោះចោលទៀត បែរជាមានតម្លៃថ្លៃ សឹងមិនគួរឱ្យជឿ ខណៈបច្ចុប្បន្នកំពុងក្លាយជាប្រធានបទក្ដៅ ធ្វើឱ្យមានការជជែកវែកញែកពេញបណ្តាញសង្គម។ ជាលើកដំបូង ដែលម៉ូឌែលស្បែកជើងថ្មីចុងក្រោយបំផុតរបស់ម៉ាក Balenciaga ដែលជាម៉ូដទាន់សម័យលំដាប់ខ្ពស់មកពីប្រទេសអេស្ប៉ាញ លក់ក្នុងតម្លៃជិត ២ពាន់ដុល្លារ ក្នុង១គូ។

ស្បែកជើងនេះមានការរចនាប្លែកជាមួយនឹងខ្សែរហែកគ្របលើស្បែកជើងទាំងសងខាង។ ជាពិសេសពណ៌នៃស្បែកជើងប៉ាតាទាំងនេះត្រូវបានមនុស្សជាច្រើនចាត់ទុកជាពណ៌មហាសែនចាស់ មិនគួរឱ្យចង់ប្រើទាល់តែសោះ។ ចំណែកឯ​រូប​សញ្ញារបស់ម៉ាកយីហោ ​ក៏​ត្រូវ​បាន​ដាក់នៅចំហៀងស្បែកជើង ដូចគេបាញ់ថ្នាំទៀត​។ កត្តា​ទាំង​អស់​នេះហើយ កាន់តែ​បន្ថែម​ម៉ូដចាស់ទ្វេដងលើ​ស្បែក​ជើង​ឱ្យមើល​ទៅ​ដូច​ជា​ត្រូវ​គេ​បោះ​ចោលអ៊ីចឹង។

ថ្វីត្បិតម៉ូដរបស់វាមើលទៅកញ្ចាស់ពិតមែន ប៉ុន្តែ​តម្លៃរបស់វា ថ្លៃ​ដល់​ទៅ ១៨៥០ដុល្លារអាមេរិកឯណោះ។ យ៉ាងណាមិញ មតិជាច្រើននិយាយថា នេះគ្រាន់តែជាល្បិចនៃការផ្សាយពាណិជ្ជកម្មរបស់ម៉ាកយីហោនោះទេ ខណៈរូបភាពពិតនៅលើគេហទំព័រលក់បង្ហាញថា ស្បែកជើងនេះមិនទាន់ចាស់នៅឡើយ គ្រាន់តែវាដូចគេបោះចោលប៉ុណ្ណោះ៕

ប្រែសម្រួល៖ សន្យា

ចុចអាន៖ បុរសម្នាក់ចំណាយពេល ៣០ឆ្នាំ ប្រមូលសំបកសត្វសមុទ្រមកច្នៃជាផ្ទះបុរាណ​ មានតែ១គត់លើលោក