បុរសម្នាក់ចំណាយពេល ៣០ឆ្នាំ ប្រមូលសំបកសត្វសមុទ្រមកច្នៃជាផ្ទះបុរាណ​ មានតែ១គត់លើលោក

យើងធ្លាប់តែឃើញគេយក​សំបកខ្យងខ្ចៅ​ទៅច្នៃ​ធ្វើ​ជា​វត្ថុ​អនុស្សាវរីយ៍​សម្រាប់​លក់​ជូន​ភ្ញៀវ​ទេសចរនៅ​រមណីយដ្ឋានផ្សេងៗ ជាពិសេសតំបន់​សមុទ្រ។ យើងប្រហែលមិនធ្លាប់នឹកស្មានទេថា បុរសជនជាតិចិនម្នាក់បានប្រែក្លាយសំបកខ្យងខ្ចៅសមុទ្រ ច្នៃជាផ្ទះបុរាណដ៏ស្រស់ស្អាត។

ដោយក្តីស្រឡាញ់ដ៏ធំធេងចំពោះមាតុភូមិ និងសមុទ្រ លោក Xiao Yongsheng បានធ្វើដំណើរគ្រប់ទីកន្លែងអស់រយៈពេល ៣០ឆ្នាំ ដើម្បីប្រមូលសំបកងាវ ខ្យង ខ្ចៅ លៀស និងគ្រំសមុទ្រជាង ១លានសំបក មកបិត និងតុបតែងក្នុងផ្ទះបែបបុរាណចិនមួយខ្នង ដែលមានទំហំ ១,៥០០ ម៉ែត្រការ៉េ។

​លោក Xiao Yongsheng បច្ចុប្បន្ន​រស់នៅ​លើ​កោះ Lingshan ក្រុង Qingdao ខេត្តសានទុង (Shandong) ប្រទេស​ចិន។ ដោយសារ​​ស្រឡាញ់​​សមុទ្រ និង​សំបកសត្វសមុទ្រខ្លាំងពេក ​បុរស​វ័យ ៥០ឆ្នាំរូបនេះ បានប្រឹង​ធ្វើ​ការ​ទាំង​យប់​ទាំង​ថ្ងៃ ដើម្បី​ប្រមូល​សំបកសត្វពី​ឆ្នេរ​ ​នៅតាមកន្លែង​ផ្សេង​ៗ​ដែល​គាត់​បាន​ទៅ​លេង រួចយកវាមកសង់​ជា​ផ្ទះ ​ដែល​មាន​លក្ខណៈ​ពិសេសប្លែកពីគេ។

ផ្ទះបុរាណ១ខ្នងនេះ ជាការរួមបញ្ចូលគ្នារវាងរចនាបថចិន និងលោកខាងលិច ដោយច្នៃប្រឌិតឱ្យលេចេញជារូបរាងខ្យងសមុទ្រ មានតែមួយគត់លើលោក។ ក្រៅពី​ជញ្ជាំង​ខាង​ក្រៅដែលបិតសុទ្ធតែសំបកសត្វសមុទ្រ ​​គ្រប់​ជ្រុង​ខាង​ក្នុងក៏​ត្រូវ​បាន​ភ្ជាប់​ដោយ​សំបក​ខ្យងខ្ចៅ និងសូម្បីតែដំបូលក៏មានបិតជាច្រើនផងដែរ។

បច្ចុប្បន្ន ផ្ទះបុរាណមួយខ្នង​នេះ​មិនត្រឹមតែ​ក្លាយ​ជា​ទីកន្លែង​ទាក់ទាញ​ភ្ញៀវ​ទេសចរ​ជា​ច្រើននោះទេ វាថែមទាំងជួយលើក​ស្ទួយវប្បធម៌​របស់​ចិនទៀតផង៕

ប្រែសម្រួល៖ សន្យា

ចុចអាន៖ អំបិលល្អជាងគេលើលោក តម្លៃកប់ពពក ១គីឡូក្រាមរាប់រយដុល្លារ