មេ​​​ដឹក​នាំ​​ទីម័រ​​​ថា​ តួនាទី​​របស់​​ចិន​​គឺ​​មិន​​អាច​​ខ្វះ​​បាន​​សម្រាប់​​សន្តិភាព​ និង​ស្ថិរភាព​​​តំបន់​

ប្រទេសចិនមានការព្រួយបារម្ភយ៉ាងខ្លាំងអំពីសេដ្ឋកិច្ចតំបន់ និងពិភពលោក ហើយបានរួមចំណែកឱកាសជាច្រើនដល់បណ្តាប្រទេសអាស៊ី។ នេះជាការលើកឡើងរបស់ប្រធានាធិបតីទីម័រខាងកើត លោក Jose Ramos-Horta។

ក្នុងបទសម្ភាសពិសេសជាមួយសារព័ត៌មាន Xinhua កាលពីថ្ងៃព្រហស្បតិ៍ លោក Ramos-Horta បានលើកឡើងថា តួនាទីរបស់ប្រទេសចិនគឺមិនអាចខ្វះបានសម្រាប់សន្តិភាព ស្ថិរភាព ការអភិវឌ្ឍ និងភាពរុងរឿងនៅក្នុងតំបន់។

លោកប្រធានាធិបតី Ramos-Horta បានរំលឹកកាលពី២០ឆ្នាំមុនក្នុងនាមប្រទេសទីម័រខាងកើត លោកបានចុះហត្ថលេខាលើសេចក្តីថ្លែងការណ៍រួមស្តីពីការបង្កើតចំណងការទូតជាមួយចិន និងទំនាក់ទំនងទេ្វភាគី ចាប់តាំងពីនោះមកកាន់តែរឹងមាំ ខ្លាំងក្លា និងភាតរភាព។

ចិនជាដៃគូពាណិជ្ជកម្មមួយដ៏សំខាន់បំផុតរបស់ទីម័រខាងកើត និងមានចិត្តសប្បុរសណាស់ក្នុងការជួយឧបត្ថម្ភគាំទ្រទីម័រខាងកើតទាំងវិស័យអប់រំ សុខាភិបាល កសិកម្ម និងហេដ្ឋារចនាសម្ព័ន្ធ។ លោក Ramos-Horta បានរៀបរាប់។

លោកប្រធានាធិបតីមានប្រសាសន៍ទៀតថា ៖«យើងមាន​​យុវជន​ជាច្រើនកំពុងបន្តការសិក្សានៅប្រទេសចិន។ ក្រុមវេជ្ជបណ្ឌិតចិនកំពុងធ្វើការនៅទីនេះហើយអ្នកជំនាញកសិកម្មចិនកំពុងផ្តល់ដំបូន្មាន​តំបន់ដាច់ស្រយាល់មួយចំនួននៅទីម័រខាងកើត។ បន្ថែមលើពីនេះទៀត ក្រុមហ៊ុនសំណងចិនធំៗកំពុងចូលរួមក្នុងការអភិវឌ្ឍហេដ្ឋារចនាសម្ព័ន្ធជាច្រើន»។

«អ្វីដែលចិនកំពុងផ្តល់ឲ្យពួកយើងគឺមានរយៈពេល២០ឆ្នាំមកហើយ។ ពិតជាមានសារសំខាន់ខ្លាំងបំផុតសម្រាប់ទីម័រខាងកើតដើម្បីបន្តរីកចម្រើនសេដ្ឋកិច្ច»។ លោកបានសង្កត់ធ្ងន់។

លោកប្រធានាធិបតីទីម័រខាងកើតបានបង្ហាញសេចក្តីសង្ឃឹមថា ចិននឹងជួយធ្វើពិពិធកម្មសេដ្ឋកិច្ចរបស់ទីម័រខាងកើត ហើយជាពិសេស ការអភិវឌ្ឍឧស្សាហកម្មរបស់ប្រទេសនឹងកាន់តែល្អប្រសើរជាមួយនឹងជំនួយរបស់ចិន។

លោក Ramos-Horta ក៏បានលើកឡើងដែរថា គោលដៅជាយុទ្ធសាស្ត្រជាតិ ទីម័រខាងកើតគឺស្ថិតក្នុងដំណើរការនៃការចូលជាសមាជិកអាស៊ាន ហើយនឹងនាំមកនូវអត្ថប្រយោជន៍ច្រើនដល់ក្រុមហ៊ុនបរទេសក្នុងការវិនិយោគនៅក្នុងប្រទេស៕

ប្រែសម្រួល៖ វីរបុត្រ
ប្រភព៖ Xinhua