តុលាការ សម្រេចមិនឃុំខ្លួនលោក កឹម សុខា ទេ តែបានព្រមានមិនឲ្យលួចធ្វើសកម្មភាពនយោបាយទៀត

ចៅក្រមសាលាដំបូងរាជធានីភ្នំពេញ នៅរសៀលថ្ងៃពុធនេះ បានសម្រេចមិនឃុំខ្លួនលោក កឹម សុខា ប្រធានអតីតគណបក្សសង្រ្គោះជាតិតាមការប្តឹងរបស់ព្រះរាជអាជ្ញាឡើយ គ្រាន់តែបានព្រមានមិនឲ្យលោក កឹម សុខា ពាក់ព័ន្ធនឹងសកម្មភាពនយោបាយណាមួយទៀត។ នេះបើតាមការបញ្ជាក់ឲ្យដឹងរបស់លោកស្រី ម៉េង សុភារី មេធាវីការពារក្តីឲ្យលោក កឹម សុខា។

លោកស្រី ម៉េង សុភារី បាន​សរសេរនៅទំព័រហ្វេសប៊ុករបស់ខ្លួនថា ៖ «ថ្ងៃនេះទី២៩ ខែមិថុនា ឆ្នាំ២០២២ តំណាងអយ្យការអមសាលាដំបូងរាជាធានីភ្នំពេញ បានប្តឹងសុំឲ្យក្រុមប្រឹក្សាជុំនុំជម្រះធ្វើការឃុំខ្លួនឯកឧត្តម កឹមសុខា ដោយយោងលើរបាយការសមត្ថកិច្ចនគរបាលថា ឯកឧត្តម កឹមសុខា បានបំពានបំរាមតុលាការត្រង់ចំណុចហាមឃាត់ការធ្វើសកម្មភាពនយោបាយ»។ ប៉ុន្តែ លោកស្រី បានអះអាងថា រហូតដល់ម៉ោងនាទី ១៖ ៤០នាទីរសៀលនេះ គឺក្រុមប្រឹក្សាជំនុំជម្រះបានប្រកាសសេចក្តីសម្រេចថា សកម្មភាពដូចក្នុងរបាយការណ៍សមត្ថកិច្ច គឺជាសកម្មភាពនយោបាយ ប៉ុន្តែមិនឃុំខ្លួនទេ គឺធ្វើការព្រមាន និងច្រានចោលការប្តឹងសុំរបស់ព្រះរាជអាជ្ញា។

សូមបញ្ជាក់ថា លោក កឹម សុខា និងក្រុមមេធាវីកំពុងតតាំងរឿងក្តីក្តាំនៅតុលាការសាលាដំបូងរាជធានីភ្នំពេញក្នុងបទចោទ សន្ទិដ្ឋិភាពជាមួយបរទេស។ លោក ត្រូវបានព្រះរាជអាជ្ញាសាលាដំបូងរាជធានីភ្នំពេញ ចោទប្រកាន់ និងប្តឹងថា បា​នធ្វើសកម្មភាពនយោបាយនេះ គឺបន្ទាប់ពីរូបលោក និងសហការី បានចុះតាមបណ្តាខេត្តជួបជាមួយប្រជាពលរដ្ឋដែលជាអ្នកគាំទ្រ និងបានទទួលជួបជាមួយអ្នកគាំទ្រនៅក្នុងផ្ទះរបស់លោកជាបន្តបន្ទាប់នាពេលកន្លងមកនេះ៕

ដោយ៖​វណ្ណ សុគន្ធា