សមត្ថកិច្ចចាប់ខ្លួនខ្មាន់កាំភ្លើងបានហើយ ករណីបាញ់សម្លាប់ក្នុងភូមិគ្រិះឧកញ៉ា លឹម ប៊ុនសួរ(មានវីដេអូ)

កម្លាំងនគរបាលនៃស្នងការនគរបាលខេត្តកណ្ដាល បានចាប់ខ្លួនជនដៃដល់ដែលបាញ់សម្លាប់ជនរងគ្រោះក្នុងភូមិគ្រិះឧកញ៉ា លឹម ប៊ុនសួរ បានហើយនៅព្រឹកថ្ងៃទី៦ ខែកក្ដដា នេះ។ ជនដៃដល់ឈ្មោះ អ៊ូ សុភី គឺជាអ្នករួមការងារជាមួយជនរងគ្រោះ។

សមត្ថកិច្ចបានឲ្យដឹងថា ជនដៃដល់ត្រូវបានកម្លាំងនគរបាលខេត្តកណ្ដាល សហការជា​មួយ​កម្លាំង​នគរបាលព្រហ្មទណ្ឌក្រសួងមហាផ្ទៃ ចាប់ខ្លួនបាននៅស្រុកស្អាង ខេត្ត​កណ្ដាល​ព្រឹកមិញនេះ និង​កំពុងធ្វើកំណត់ហេតុស្ដាប់ចម្លើយ។ ជនដៃដល់មានស្រុកកំណើតនៅស្រុកស្អាង រីឯភរិយាមាន​ស្រុកកំណើតនៅក្រុងតាខ្មៅ។

សូមបញ្ជាក់ថា ជនដៃដល់ គឺជាអ្នកបើកឡានអោយកូនម្ចាស់ផ្ទះ ចំណែកជនរងគ្រោះ​ជាអ្នកបើកឡានអោយឪពុក គឺជាអ្នករួមការងារនៅផ្ទះតែមួយ។

គួរំលឹកថា កាលពីរសៀលថ្ងៃទី៥​ ខែកក្ដដា ម្សិលមិញនេះ មាករណីបាញ់ប្រហារចំនួន១០គ្រាប់ ក្នុងភូមិគ្រិះឧកញ៉ា លឹម ប៊ុនសួរ ស្ថិតតាមបណ្ដោយផ្លូវលេខ៣២២ ក្នុងសង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ បណ្ដាលឲ្យអង្គរក្សម្នាក់ស្លាប់ភ្លាមៗនៅកន្លែងកើតហេតុ៕

អត្ថបទ៖ សុខុម