ករណីបាញ់បោះនៅខេត្តព្រះសីហនុ÷ សមត្ថកិច្ចឃាត់ខ្លួនជនជាតិចិន នេប៉ាល់ ខ្មែរសរុប៤៧នាក់ និងកាំភ្លើង១៣ដើម

សមត្ថកិច្ចខេត្តព្រះសីហនុ ឃាត់ខ្លួនជនជាតិចិន នេប៉ាល់ ខ្មែរសរុប៤៧នាក់ និងកាំភ្លើង១៣ដើម ក្នុងហេតុការណ៍ផ្ទុះអាវុធ មួយកើតឡើង បង្កដោយជនជាតិចិន២ក្រុម មានគ្នាជាច្រើននាក់ កាលពីថ្ងៃទី១១ ខែកញ្ញា ឆ្នាំ២០២៥ នៅហាងបាយនៅចំនុចព្រីនមល អូឈើទាល ស្ថិតនៅភូមិ៤ សង្កាត់លេខ៤ ក្រុង-ខេត្តព្រះសីហនុ។ នេះបើតាមសេចក្ដីប្រកាសព័ត៌មាននៅលើទំព័រហ្វេសប៊ុកផ្លូវការរបស់ស្នងការដ្ឋាននគរបាលខេត្តព្រះសីហនុផ្សព្វផ្សាយនារសៀលថ្ងៃទី១២ ខែកញ្ញានេះ។

ស្នងការដ្ឋាននគរបាលខេត្តព្រះសីហនុអះអាងថា បន្ទាប់ពីទទួលបានព័ត៌មានភ្លាមៗ ពីប្រជាពលរដ្ឋកាលពីវេលាម៉ោង២២និង០០នាទីយប់ ថ្ងៃទី១១ ខែកញ្ញា សមត្ថកិច្ចបានជំនាញ បានចុះទៅដល់ទីតាំងកើតហេតុ ដោយឃាត់ខ្លួនបានជនសង្ស័យជនជាតិចិន ១៤នាក់ (ស្រី១នាក់) និងដកហូតបានអាវុធខ្លី១ដើម ម៉ាក Zoraki មានបង់១ គ្រាប់១គ្រាប់។

បន្ទាប់មក កម្លាំងជំនាញបានបន្តធ្វើការស្រាវជ្រាវជាបន្តបន្ទាប់ រហូតឃាត់ខ្លួនបានជនសង្ស័យ ៣៣នាក់ (ស្រី២នាក់) បន្ថែមទៀត។

សរុបសមត្ថកិច្ចជំនាញ ឃាត់ខ្លួនជនសង្ស័យចំនួន ៤៧នាក់ ស្រី ៥នាក់ (ចិន ៣៥នាក់ ស្រី ៣នាក់,នេប៉ាល់ ៤នាក់ និងខ្មែរ ៨នាក់ ស្រី ២នាក់) ។វត្ថុតាងដកហូតបាន រួមមាន កាំភ្លើងចំនួន១៣ដើម (អាវុធវែង ២ដើម និងអាវុធខ្លី ១១ដើម) គ្រាប់ជាច្រើនគ្រាប់ ម្សៅស សង្ស័យជាសារធាតុញៀនមួយចំនួនរថយន្តចំនួន ៥គ្រឿង។

ស្នងការថានគរបាលខេត្តព្រះសីហនុអះអាងថា សមត្ថកិច្ចកំពុងធ្វើការស្រាវស្រាវបន្ថែមចំពោះមូលហេតុ ដែលនាំឲ្យមានករណីផ្ទុះអាវុធនេះ ដើម្បីកសាងសំណុំរឿងបញ្ជូនទៅអយ្យការអមសាលាដំបូងខេត្តព្រះសីហនុ ចាត់ការតាមនីតិវិធី ៕