អ៊ុយក្រែន ហាមប្រាមការប្រារព្ធទិវាឯករាជ្យជាតិ ខ្លាច រុស្ស៊ី វាយប្រហារ (មានវីដេអូ)

ប្រទេសអ៊ុយក្រែន ​បាន​ហាមប្រាមការ​ប្រារព្ធ​ពិធីជា​សាធារណៈ ​ដែលអបអរទិវា​​ឯករាជ្យ​ជាតិ​លើក​ទី៣១របស់ខ្លួន ដោយសារតែ​ខ្លាច​មាន​ការ​វាយ​ប្រហារ​ជាថ្មី​ពីសំណាក់ ​រុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋបាលក្រុងនិយាយថា ការប្រមូលផ្តុំទ្រង់ទ្រាយធំៗ ត្រូវបានហាមឃាត់នៅក្នុងទីក្រុងកៀវ ចាប់ពីថ្ងៃទី២២ដល់ថ្ងៃទី២៥ខែសីហា។

មជ្ឈមណ្ឌលទំនាក់ទំនងយុទ្ធសាស្ត្ររបស់អ៊ុយក្រែន (StratCom) បាននិយាយនៅលើ Telegram ថា “ការគំរាមកំហែងនៃការបាញ់ផ្លោងខ្លាំងក្លា លើទឹកដីនៃប្រទេសអ៊ុយក្រែនជាមួយនឹងមីស៊ីល S-300 គឺពិតជាអាចកើតឡើង។ ទាក់ទងនឹងការមកដល់នៃរថភ្លើងជាច្រើនគ្រឿងពីប្រទេសរុស្ស៊ី មុនថ្ងៃទី២០ខែសីហា វាច្បាស់ណាស់ថា រុស្ស៊ីកំពុងរៀបចំវាយប្រហារអ៊ុយក្រែននៅថ្ងៃទី ២៤ ខែសីហានេះ”។

កាលពីថ្ងៃចន្ទទី២២ខែសីហា ប្រធានាធិបតីអ៊ុយក្រែនលោក Volodymyr Zelensky បានចេញការព្រមានថា កងកម្លាំងរុស្ស៊ីអាចនឹងបង្កើនការវាយប្រហារទ្រង់ទ្រាយធំបន្ថែមទៀតលើប្រទេសរបស់លោកក្នុងសប្តាហ៍នេះ។

នៅក្នុងវីដេអូដែលចេញផ្សាយកាលពីថ្ងៃសៅរ៍ លោក Zelensky និយាយថា “រុស្ស៊ីអាចព្យាយាមធ្វើអ្វីដែលអាក្រក់ជាងនេះ ជាពិសេសអំពើឃោរឃៅដែលយើងនឹកស្មានមិនដល់”។

គួរបញ្ជាក់ថា ថ្ងៃ​ពុធទី២៤ខែសីហានេះ​ គឺ​មានរយៈពេល៦ខែហើយគត់ ​ចាប់​តាំង​ពី​កង​កម្លាំង​រុស្ស៊ី ​បើកប្រតិបត្តិយោធាពិសេសលុកលុយលើ​អ៊ុយក្រែន ហើយក៏​ជាទិវា​ឯករាជ្យ​របស់​អ៊ុយក្រែនផងដែរ ក្រោយប្រកាសចាកចេញពីសហភាពសូវៀតនៅថ្ងៃទី ២៤ ខែសីហាឆ្នាំ ១៩៩១៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ TRT

ចុចអាន៖ លោក Zelensky ថា រុស្ស៊ី នឹងបើកការវាយប្រហារសាហាវៗលើ អ៊ុយក្រែន ក្នុងថ្ងៃឯករាជ្យ