លោក Zelensky ថា រុស្ស៊ី នឹងបើកការវាយប្រហារសាហាវៗលើ អ៊ុយក្រែន ក្នុងថ្ងៃឯករាជ្យ

ប្រធានាធិបតីអ៊ុយក្រែនលោក Volodymyr Zelensky បានចេញការព្រមានថា កងកម្លាំងរុស្ស៊ីអាចនឹងបង្កើនការវាយប្រហារសាហាវៗបន្ថែមទៀតលើប្រទេសរបស់លោកក្នុងសប្តាហ៍នេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្ងៃ​ពុធ ទី ២៤ ខែសីហានេះ​គឺ​មានរយៈពេល ៦ ខែហើយ ​ចាប់​តាំង​ពី​កង​កម្លាំង​រុស្ស៊ី​បើកប្រតិបត្តិយោធាពិសេសលុកលុយលើ​អ៊ុយក្រែន ហើយវា​ក៏​ជា​ថ្ងៃ​ឯករាជ្យ​របស់​អ៊ុយក្រែនផងដែរ ក្រោយប្រកាសចាកចេញពីសហភាពសូវៀតនៅថ្ងៃទី ២៤ ខែសីហាឆ្នាំ ១៩៩១ ។

នៅក្នុងវីដេអូមួយដែលបានចេញផ្សាយកាលពីថ្ងៃសៅរ៍ លោក Zelensky បាននិយាយថា “រុស្ស៊ីអាចព្យាយាមធ្វើអ្វីដែលអាក្រក់ជាងនេះ ជាពិសេសអំពើឃោរឃៅដែលយើងមិននឹកស្មានដល់” ។

ពាក់ព័ន្ធនឹងបញ្ហានេះដែរ អាជ្ញាធរនៅតំបន់ភាគខាងកើតនៃទីក្រុង Kharkov ដែលនៅជិតប្រទេសរុស្ស៊ីបានហាមឃាត់ប្រជាពលរដ្ឋមិនឲ្យចាកចេញពីផ្ទះរបស់ពួកគេ ចាប់ពីយប់ថ្ងៃអង្គារដល់ព្រឹកថ្ងៃព្រហស្បតិ៍ ។

ចំណែកអាជ្ញាធរនៅកន្លែងផ្សេងទៀតក្នុងប្រទេសអ៊ុយក្រែនក៏បានរាយការណ៍ពីការបាញ់ផ្លោងនៅក្នុងទីក្រុង Nikopol ជាទីក្រុងដែលឆ្លងកាត់ទន្លេពីស្ថានីយ៍ថាមពលនុយក្លេអ៊ែរ Zaporizhzhia ក៏ដូចជាការវាយប្រហារពីកាំជ្រួចមីស៊ីលលើទីតាំងនានានៅទីក្រុងកំពង់ផែ Odesa ដែលរក្សាទុកគ្រាប់ធញ្ញជាតិរបស់អ៊ុយក្រែនសម្រាប់ការនាំចេញទៅកាន់ប្រទេសនានា ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អ៊ុយក្រែន តាំងបង្ហាញខ្មោចរថក្រោះ រុស្ស៊ី ពេញទីក្រុងកៀវ មុនថ្ងៃឯករាជ្យ