ចាប់ខ្លួនបុរសនីហ្សេរីយ៉ាម្នាក់បញ្ជូនទៅតុលាការ ករណីឆបោក

នៅព្រឹកថ្ងៃទី១២ ខែតុលា ឆ្នាំ២០២២ នគរបាលនាយកដ្ឋានព្រហ្មទណ្ឌក្រសួងមហាផ្ទៃ បានចាប់បញ្ជូនខ្លួនជនសង្ស័យឈ្មោះ KEL CHI ភេទប្រុសអាយុ៣៧ឆ្នាំ ជនជាតិនីហ្សេរីយ៉ា បញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់ ពាក់ព័ន្ធករណីឆបោកលុយ៥ពាន់ដុល្លារ តាមបណ្តាញសង្គមហ្វេសប៊ុក។

ប្រភពព័ត៌មានបានឲ្យដឹង ជនរងគ្រោះមានឈ្មោះ អុន ស្រីណែត ភេទស្រីអាយុ២៤ឆ្នាំ ។ កាលពីអំឡុងខែសីហាឆ្នាំ២០២២ មានគណនីហ្វេសប៊ុកមួយឈ្មោះ Don Richard បានឆាតមកសុំជនរងគ្រោះរាប់អាន ហើយក៏ឆាតមកសួរសុខទុក្ខ និងលួងលោមសុំស្រលាញ់ជនរងគ្រោះ។ លុះដល់អំឡុងខែកញ្ញា ឆ្នាំ២០២២ គណនីហ្វេសប៊ុកឈ្មោះ Don Richard ដដែលបានឆាតមកប្រាប់ជនរងគ្រោះថា គាត់ចង់ផ្ញើសំភារៈ និងប្រាក់មួយចំនួនពីប្រទេសកូរ៉េ មកឲ្យជនរងគ្រោះតាមយន្តហោះ ដល់ថ្ងៃទី៣០ ខែកញ្ញា ឆ្នាំ២០២២ ក៏មានស្រ្តីម្នាក់បានទូរស័ព្ទមកប្រាប់ជនរងគ្រោះថា ខ្លួនជាមន្ត្រី​គយនៅប្រលានយន្តហោះភ្នំពេញ មានឥវ៉ាន់ផ្ញើពីបរទេសមកឲ្យជនរងគ្រោះ ដោយសារតែមិនទាន់បានបង់ពន្ធ ទើបគយឃាត់ទុក ហើយតម្រូវឲ្យជនរងគ្រោះជាអ្នកទទួលបង់ប្រាក់ចំនួន១ម៉ឺនដុល្លារ ដើម្បីទូទាត់ថ្លៃពន្ធសិន ទើបជនរងគ្រោះអាចទៅទទួលកញ្ចប់ឥវ៉ាន់នោះបាន។

មុនដំបូងជនរងគ្រោះមិនជឿលើគណនីហ្វេសប៊ុកឈ្មោះ Don Richard ទេ ដោយសារមានស្ត្រីម្នាក់អះអាងថា ខ្លួនជាមន្ត្រីគយ ទើបជនរងគ្រោះចាញ់ល្បិចបោកប្រាស់របស់ក្រុមឆបោកទាំងនោះ ដោយបានផ្ញើប្រាក់ជាបន្តបន្ទាប់ចូលលេខទូរស័ព្ទចំនួនពីរខ្សែ អស់លុយចំនួន៥ពាន់ដុល្លារតាមរយៈ វីង និងទ្រូម៉ានី ហើយរឿងរ៉ាវនេះដឹងដល់ក្រុមគ្រួសារ គ្រួសារ​ថាខ្លួនចាញ់បោកគេហើយ ទើបខ្លួនប្តឹងសមត្ថកិច្ចតែម្តង។

ក្រោយធ្វើការស្រាវជ្រាវទើបដឹងថា ម្ចាស់គណនីហ្វេសបុកនោះ គឺជាបុរសជនជាតិនីហ្សេរីយ៉ាជាអ្នកឆបោកសោះ៕

អត្ថបទ៖ មករា