មន្ត្រីក្រសួងសុខាភិបាល៖ ការបំបៅកូនដោយទឹកដោះម្ដាយជាការចាំបាច់បំផុតសម្រាប់ទារក

លោកស្រី ប្រាក់ សោភ័ណ្ឌនារី រដ្ឋលេខាធិការក្រសួងសុខាភិបាលបានថ្លែងថា ការបង្កើនអត្រាបំបៅកូនដោយទឹកដោះម្ដាយ ជាការចាំបាច់ណាស់សម្រាប់ការលើកកម្ពស់ចំណេះដឹងដល់ស្ត្រីមានផ្ទៃពោះ និងម្តាយក្រោយសម្រាល។

លោកស្រីថ្លែងបែបនេះ ក្នុងពិធីដាក់ឲ្យអនុវត្តសាកល្បងគម្រោងមណ្ឌលសុខភាពស្រលាញ់ទារក និងការថែទាំព្យាបាលបញ្ហាកង្វះអាហារូបត្ថម្ភស្រួចស្រាល់នៅខេត្តសៀមរាប នាថ្ងៃទី២៩ វិច្ឆិកា ឆ្នាំ២០២២នេះ។

បើតាមលោកស្រី ប្រាក់ សោភ័ណ្ឌនារី ក្រសួងសុខាភិបាលបានសហការជាមួយដៃគូអភិវឌ្ឍន៍ ជាពិសេសអង្គការទស្សនៈពិភពលោកអន្តរជាតិ ដើម្បីបង្កើនអត្រាបំបៅដោះកូនដោយទឹកដោះម្ដាយនៅទូទាំងប្រទេស។

លោកស្រីថ្លែងដូច្នេះថា៖ «ការបំបៅដោះកូនដោយទឹកដោះម្ដាយ គឺជាការចាំបាច់ណាស់ក្នុងការលើកកម្ពស់ចំណេះដឹងនៅក្នុងចំណោមស្ត្រីដែលមានផ្ទៃពោះ និងម្តាយនៅពេលក្រោយសម្រាល អំពីអត្ថប្រយោជន៍នៃការបំបៅកូនដោយទឹកដោះម្ដាយ»។

មន្ត្រីជាន់ខ្ពស់ក្រសួងសុខាភិបាលរូបនេះ បន្ថែមថា ការគាំទ្របុគ្គលិកនៅតាមមណ្ឌលសុខភាពសម្រាប់ការលើកកម្ពស់ការបំបៅកូនដោយទឹកដោះម្តាយ នឹងផ្តល់លទ្ធភាពឲ្យពួកគេអប់រំស្ត្រីមានផ្ទៃពោះ និងម្តាយក្រោយសម្រាល អំពីសារៈសំខាន់ និងអត្ថប្រយោជន៍នៃការបំបៅកូនដោយទឹកដោះម្ដាយ។

ត្រង់ចំណុចនេះ លោកស្រី បានគូសបញ្ជាក់ថា ការដាក់ទារកប៉ះទៅស្បែកម្តាយភ្លាមៗនៅពេលសម្រាល និងការចាប់ផ្តើមបំបៅកូនដោយទឹកដោះម្តាយក្នុងមួយម៉ោងដំបូងនៃការសម្រាល គឺជាការសំខាន់បំផុត ហើយចាំបាច់ត្រូវផ្សព្វផ្សាយទាំងអំឡុងពេលមានផ្ទៃពោះ និងក្រោយពេលសម្រាល។ ទន្ទឹមនេះ បុគ្គលិកមណ្ឌលសុខភាព ក៏ត្រូវជួយដល់ការបំបៅកូនដោយទឹកដោះម្តាយ ផងដែរ តាមរយៈវិធីទំនាក់ទំនងម្តាយនឹងទារក និងការដាក់ទីតាំងទារកបំបៅ ដើម្បីលើកកម្ពស់សុខុមាលភាពរបស់កុមារនៅកម្ពុជា។

គួរជម្រាបថា ទសវត្សរ៍​ឆ្នាំ៩០ និង​ដើមឆ្នាំ២០០០ ប្រទេសកម្ពុជា ទទួលបានសមិទ្ធផលដ៏គួរឲ្យចាប់អារម្មណ៍នៃ​ភាគរយ​ទារកដែល​បៅដោះម្តាយយតែមួយមុខគត់ក្នុង​រយៈពេល ៦ខែ​ដំបូង​នៃ​ជីវិត​របស់​ពួកគេដែលមានរហូតដល់ ៧៤ភាគរយ ​ក្នុង​ឆ្នាំ២០១០។

ប៉ុន្តែក្រោយមក​បាន​ថយចុះ​មក​ត្រឹម ៥១ភាគរយក្នុងឆ្នាំ២០២១ ខណៈនៅកម្ពុជាការសម្រាលកូននៅទីតាំងសុខាភិបាល ដូចជាមណ្ឌលសុខភាព គ្លីនិក និងមន្ទីរពេទ្យ មានចំនួន ៩៨ភាគរយ។ តែអត្រាភាគរយទាបនៃការចាប់ផ្តើមបំបៅកូនដោយទឹកដោះម្តាយដំបូង គឺទារកទើបនឹងកើតត្រឹមតែ ៥៤ភាគរយប៉ុណ្ណោះដែលត្រូវបានបំបៅដោយទឹក ដោះម្តាយក្នុងរយៈពេល ១ម៉ោងក្រោយពេលកើត៕

ដោយ៖ ធឿន វ៉ាន់សុង