តុលាការ មីយ៉ាន់ម៉ា បិទបញ្ចប់សវនាការសម្រេចឲ្យលោកស្រី អ៊ុងសាន ស៊ូជី ជាប់ពន្ធនាគារសរុប ៣៣ ឆ្នាំ

តុលាការដែលគ្រប់គ្រងដោយយោធាមីយ៉ាន់ម៉ាបានបិទបញ្ចប់សវនាការជាបន្តបន្ទាប់លើអតីតមេដឹកនាំជាប់ឆ្នោតដែលត្រូវបណ្ដេញចេញគឺលោកស្រី អ៊ុងសាន ស៊ូជី ដោយកាត់ទោសលោកស្រីឲ្យពន្ធនាគារសរុបរយៈពេល ៣៣ ឆ្នាំ ។

ប្រភព​ព័ត៌មាន​មួយ​និយាយ​ថា នៅក្នុងសវនាការបិទទ្វារកាលពីថ្ងៃសុក្រ លោកស្រី​អ៊ុ ងសាន ស៊ូជី ត្រូវ​បាន​រក​ឃើញ​ថា​មាន​ពិរុទ្ធ​ពី​បទ​ពុក​រលួយ​ចំនួន ៥ ករណី រាប់​បញ្ចូល​ទាំង​ការ​ជួល និងប្រើប្រាស់​ឧទ្ធម្ភាគចក្រ ខណៈលោកស្រីនៅជាមេដឹកនាំមីយ៉ាន់ម៉ា ។

តាមសេចក្តីរាយការណ៍បានឲ្យដឹងថា ចំពោះបទចោទប្រកាន់ថ្មីនេះ តុលាការបានផ្តន្ទាទោសអតីតមេដឹកនាំមីយ៉ាន់ម៉ាវ័យ ៧៧ ឆ្នាំរូបនេះដាក់ពន្ធនាគាររយៈពេល ៧ ឆ្នាំបន្ថែមលើទោសជាប់ពន្ធនាគាររយៈពេល ២៦ ឆ្នាំ ចាប់តាំងពីខែធ្នូ ឆ្នាំមុន ។ ដូច្នេះ មានន័យថា លោកស្រីត្រូវជាប់ពន្ធនាគាររយៈពេល ៣៣ ឆ្នាំ ។

ការផ្ដន្ទាទោសជាបន្តបន្ទាប់ពីសំណាក់យោធាមីយ៉ាន់ម៉ា ត្រូវបានគេមើលឃើញថា ទំនងជាកំពុងព្យាយាមលុបបំបាត់ឥទ្ធិពលនយោបាយរបស់លោកស្រី អ៊ុងសាន ស៊ូជី មុនពេលការបោះឆ្នោតសកលដែលនឹងធ្វើឡើងនៅឆ្នាំក្រោយ ។

ទន្ទឹមនោះ ការផ្តន្ទាទោសនេះក៏កើតឡើង ទោះបីជាកាលពីសប្តាហ៍មុន ក្រុមប្រឹក្សាសន្តិសុខអង្គការសហប្រជាជាតិ បានអនុម័តដំណោះស្រាយលើកដំបូងរបស់ខ្លួន ដោយអំពាវនាវឲ្យមានការដោះលែងអ្នកជាប់ឃុំទាំងអស់រួមទាំងលោកស្រី អ៊ុងសាន ស៊ូជី ដែលបានធ្វើឡើង ចាប់តាំងពីរដ្ឋប្រហារកាលពីខែកុម្ភៈឆ្នាំមុន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ចិន តែងតាំង រដ្ឋមន្ត្រីការបរទេសថ្មី ជំនួសលោក Wang Yi