ព័ត៌មានជាតិ

អភិបាលខេត្តបាត់ដំបងអំពាវនាវដល់ពលករខ្មែរមកពីថៃកុំរត់គេចវេះពីកន្លែងធ្វើចត្តាឡីស័ក

បានផុស

៥ years មុន

នៅ

ថ្ងៃសៅរ៍ ៩ មករា ២០២១

ដោយ

លោក ងួន រតនៈ អភិបាល នៃគណៈអភិបាលខេត្តបាត់ដំបងបានអំពាវនាវពលករទើបត្រឡប់មកពីប្រទេសថៃ ត្រូវចូលរួមតាមវិធានការទប់ស្កាត់ជំងឺកូវីដ១៩ អនុវត្តតាមការណែនាំរបស់មន្ត្រីសុខាភិបាល ធ្វើចត្តាឡីស័កឲ្យបានគ្រប់កាលកំណត់។

ការអំពាវនាវនេះបានធ្វើឡើងខណៈពេលដែលលោកបានដឹកនាំមន្ត្រីសាលាខេត្ត ចុះពិនិត្យស្ថានភាពមណ្ឌលចត្តាឡីស័កស្រុកជាយដែនជាប់ព្រំប្រទល់ប្រទេសថៃចំនួន៣ស្រុករួមមាន ស្រុកសំពៅលូន ស្រុកភ្នំព្រឹក និងស្រុកកំរៀង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អភិបាលបានណែនាំដល់បងប្អូនពលករថា «សូមកុំរត់គេចវេះពីកន្លែងធ្វើចត្តាឡីស័ក ឫ មិនព្រមចូលមកធ្វើចត្តាឡីស័ក បើពុំនោះទេមិនត្រឹមតែធ្វើឲ្យប៉ះពាល់ខាតបង់ពេលវេលាសម្រាប់តែខ្លួនឯងម្នាក់ប៉ុណ្ណោះទេ ថែមទាំងនាំគ្រួសារ និងអ្នកមានទំនាក់ទំនងជាមួយ មកធ្វើចត្តាឡីស័កទាំងអស់គ្នា ក្នុងរយៈពេល១៤ថ្ងៃ និងធ្វើតេស្តយកសំណាក តាមគោលការណ៍ក្រសួងសុខាភិបាល»។

លោកបានមានប្រសាសន៍ថា ចំពោះពលករកំពុងធ្វើការងារនៅប្រទេសថៃ បើពុំមានកិច្ចការចាំបាច់ សូមកុំទាន់ត្រឡប់មកស្រុកកំណើតវិញ សូមធ្វើការនៅកន្លែងណានៅទីនោះសិន ស្ដាប់តាមការណែនាំរបស់អាជ្ញាធរថៃ ពាក់ព័ន្ធការទប់ស្កាត់ជំងឺកូវីដ១៩នេះ ហើយកុំជឿតាមការញុះញង់របស់ពួកមេខ្យល់ ក្នុងការនាំឆ្លងដែនខុសច្បាប់ និងគេចវេះពីការពិនិត្យសុខភាព និងការធ្វើចត្តាឡីស័ក។

លោកអភិបាលខេត្តក៏បានណែនាំដល់កងកម្លាំងការពារព្រំដែនទាំងអស់សូមបន្តសហការគ្នាក្នុងការពិនិត្យឲ្យបានហ្មត់ចត់នូវពលករឆ្លងដែន។

គិតត្រឹមថ្ងៃ៧ ខែមករា ឆ្នាំ២០២១ នៅខេត្តបាត់ដំបងមានពលករវិលត្រឡប់មកពីប្រទេសថៃ សរុបប្រមាណ២១៤០នាក់ ត្រូវបានមន្ត្រីសុខាភិបាលធ្វើការពិនិត្យសុខភាព និងយកសំណាកសរុបប្រមាណ១៨០០នាក់ និងបញ្ចប់ចត្តាឡីស័កដោយអនុញ្ញាតឲ្យត្រឡប់ទៅផ្ទះវិញចំនួន៣៣២នាក់ និងអ្នកឆ្លងជំងឺកូវីដ១៩មានចំនួន៦នាក់ផងដែរ។

គួរបញ្ជាក់ថា គិតត្រឹមម៉ោង៧ព្រឹកថ្ងៃទី០៩ ខែមករា ឆ្នាំ២០២១នេះ កម្ពុជារកឃើញករណីឆ្លងកូវីដ១៩ សរុបចំនួន៣៨៧នាក់ ក្នុងនោះមាន២២នាក់ជាពលករខ្មែរមកពីថៃនិងមានអ្នកបានជាសះស្បើយ៣៦៥នាក់ និងអ្នកជំងឺចំនួន២២នាក់ កំពុងសម្រាកព្យាបាលនៅមន្ទីរពេទ្យ៕

អត្ថបទ ៖ សំអឿន