នាយករដ្ឋមន្ត្រី អំពាវនាវដល់និស្សិតត្រូវបន្តប្រឹងប្រែងរៀនសូត្រ ដោយមិនមែនបញ្ចប់ត្រឹមទទួលសញ្ញាបត្រឡើយ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវដល់និស្សិត ត្រូវបន្តប្រឹងប្រែងសិក្សារៀនសូត្រ ដោយមិនមែនបញ្ចប់ត្រឹមទទួលសញ្ញាបត្រឡើយ។

នៅក្នុងពិធីចែកសញ្ញាបត្រ ជូននិស្សិត​សាកលវិទ្យាល័យបៀលប្រាយជាង ៤ពាន់នាក់ នាព្រឹកថ្ងៃទី ១៦ ខែមីនានេះ សម្ដេចតេជោ ហ៊ុន សែន បានបន្តអំពាវនាវដល់និស្សិត ដែលទទួលសញ្ញាបត្រនៅពេលនេះ ត្រូវខិតខំប្រឹងប្រែងសិក្សារៀនសូត្របន្តទៀត មិនមែនបញ្ចប់ត្រឹមនេះឡើយ។ តាមសម្ដេចនាយករដ្ឋមន្ត្រី សញ្ញាបត្រ គឺជារឿងមួយ តែរឿងសំខាន់ជាងនេះ គឺសកម្មភាព និងប្រសិទ្ធិភាពការងារទៅវិញទេ។

ប្រមុខរាជរដ្ឋាភិបាល លើកឡើងបែបនេះថា «រឿងនេះ សូមកុំមើល កុំឃើញថា ខ្លួនបានទទួលបណ្ឌិត ឬបរិញ្ញាបត្រជាន់ខ្ពស់ ឬបរិសញ្ញាបត្រហើយ គឺជារឿងចប់ មិនមែនទេ ក៏ដូចជាគ្នាដែរ មន្ត្រី កុំថា ខ្លួនធ្វើរដ្ឋមន្ត្រី ខ្លួនធ្វើឧបនាយករដ្ឋមន្ត្រី ឬធ្វើនាយករដ្ឋមន្ត្រី ឬធ្វើប្រធានសភា អនុប្រធានសភា ខ្លួនមិនរៀន សមាជិកសភា ខ្លួនមិនរៀន អត់ទៅរួចទេៗ»៕