បែកធ្លាយ ចំនួនកងកម្លាំងពិសេសលោកខាងលិច កំពុងធ្វើ​ប្រតិបត្តិការនៅ អ៊ុយក្រែន

ចក្រភព​អង់គ្លេស គឺ​ស្ថិត​ក្នុង​ចំណោម​ប្រទេស​មួយ​ចំនួន ​ដែល​មាន​កង​កម្លាំង​ពិសេស កំពុងធ្វើ​ប្រតិបត្តិការ​នៅ​ក្នុង​ប្រទេស​អ៊ុយក្រែន។ ​នេះ​បើ​ការលាតត្រដាងពី​ឯកសារ​មួយ ​ក្នុង​ចំណោម​ឯកសារ​រាប់​សិប​ដែល​លេច​ធ្លាយ​លើអ៊ីនធឺណិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកសារលេចធ្លាយទាំងនោះ ដែលមានខ្លះត្រូវបានគេដាក់សញ្ញាសម្គាល់ថា “កំពូលអាថ៌កំបាំង” គឺបានរៀបរាប់លម្អិតអំពីសង្រ្គាមនៅអ៊ុយក្រែន រួមទាំងព័ត៌មានដ៏រសើបពាក់ព័ន្ធការរៀបចំរបស់អ៊ុយក្រែន សម្រាប់ការវាយលុកនៅនិទាឃរដូវផងដែរ។

ទោះបីជាយ៉ាងណាក៏ដោយ រដ្ឋាភិបាល​អាមេរិក​និយាយ​ថា ខ្លួន​កំពុង​ស៊ើបអង្កេត រក​ប្រភព​នៃ​ការ​លេច​ធ្លាយ​នេះ។

យោង​តាម​ឯកសារ​ចុះ​ថ្ងៃ​ទី២៣ខែ​មីនា, ចក្រភព​អង់គ្លេស​មាន​កង​កម្លាំង​ពិសេស​ធំ​ជាង​គេ​នៅ​អ៊ុយក្រែន ពោលគឺមានចំនួន៥០នាក់ បន្ទាប់មកគឺរដ្ឋជាសមាជិក​ណាតូដូចជា ឡាតវី ១៧នាក់, បារាំង១៥នាក់, អាមេរិក១៤នាក់ និង​ហូឡង់ ១នាក់។

យ៉ាងណាក្តី ឯកសារ​នេះ​មិន​បាន​បញ្ជាក់ទេ​ថា​តើ ​កង​កម្លាំងទាំងនេះស្ថិត​នៅ​ទី​ណា ឬ​កំពុង​ធ្វើ​អ្វី​នោះ​ទេ។

វត្តមានរបស់ពួកគេនៅក្នុងប្រទេសអ៊ុយក្រែន ទំនងជារុស្ស៊ីបានដឹងរួចទៅហើយ ព្រោះក្នុងរយៈពេលប៉ុន្មានខែថ្មីៗនេះ ទីក្រុងមូស្គូបានអះអាងថា ខ្លួនមិនមែនគ្រាន់តែប្រឈមមុខនឹងអ៊ុយក្រែនប៉ុណ្ណោះទេ ប៉ុន្តែក៏ជាមួយអង្គការណាតូផងដែរ។

មកទល់ពេលនេះ ក្រសួងការពារជាតិអង់គ្លេស មិនទាន់ធ្វើអត្ថាធិប្បាយអ្វីទេលើឯកសារលេចធ្លាយនេះ ប៉ុន្តែនៅក្នុងការបង្ហោះ Twitter កាលពីថ្ងៃអង្គារ ក្រសួងបានគូសបញ្ជាក់ថា ការលេចធ្លាយព័ត៌មានសម្ងាត់ បានបង្ហាញពីព័ត៌មានមិនត្រឹមត្រូវយ៉ាងច្រើន៕

ប្រែសម្រួល៖ Vann Vann

ប្រភព៖ BBC

ចុចអាន៖ បែកធ្លាយព័ត៌មានសម្ងាត់! អ៊ុយក្រែន នឹង អស់ ខែលការពារមីស៊ីល ត្រឹម ខែក្រោយ