កីឡា

ក្លិបលីគកំពូលកម្ពុជា៤ទៅកម្តៅសាច់ដុំនៅក្រៅប្រទេសត្រៀមរដូវកាលថ្មី

បានផុស

១ year មុន

នៅ

ថ្ងៃព្រហស្បតិ៍ ២៩ មិថុនា ២០២៣

ដោយ

បច្ចុប្បន្នក្រុម១០កំពុងត្រៀមខ្លួនយ៉ាងសកម្មដើម្បីប្រកួតខេមបូឌានព្រីមៀរលីគរដូវកាលថ្មី២០២៣-២៤ ដែលនឹងចាប់ផ្តើមបើកទំព័រនៅថ្ងៃទី៥ ខែសីហា ខាងមុខ។

ក្លិបនីមួយៗកំពុងត្រៀមដោះដូរសមាជិកថ្មី និងប្រកួតមិត្តភាពកម្តៅសាច់ដុំដើម្បីរៀបចំក្រុមឲ្យបានល្អ។ ក្លិបខ្លះកំពុងប្រកួតពានរង្វាន់មិត្តភាពកម្តៅសាច់ដុំបើករដូវកាលថ្មី ហើយក្លិបខ្លះចេញទៅប្រកួតមិត្តភាពនៅក្រៅប្រទេស។

រហូតដល់ពេលនេះមានក្លិបលីគកំពូលកម្ពុជា៤បាន និងកំពុងត្រៀមខ្លួនចេញទៅប្រកួតមិត្តភាពដើម្បីដកស្រងបទពិសោធ កែលំអចំណុចខ្វះខាត និងពង្រឹងស្មារតីក្រុមដើម្បីក្លាយជាក្រុមដ៏ល្អសម្រាប់រដូវកាលថ្មី។

ភ្នំពេញក្រោន

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្លិបបាល់ទាត់ជោគជ័យនៅលីគកំពូលកម្ពុជាគឺភ្នំពេញក្រោនបានចេញទៅប្រកួតមិត្តភាពអន្តរជាតិរួចហើយនៅប្រទេសឥណ្ឌូណេស៊ីដោយបានស្មើ ២-២ ជាមួយម្ចាស់ផ្ទះ PSIS FC កាលពីថ្ងៃទី២៤ ខែមិថុនា ឆ្នាំ២០២៣។ ក្លិបជើងឯកលីគកំពូលកម្ពុជា២រដូវកាលជាប់គ្នានេះអាចនឹងមានការប្រកួតក្នុងស្រុកបន្ថែមទៀតនាខែកក្កដាខាងមុខ។ ក្លិបនេះត្រៀមខ្លួនប្រកួតទាំងលីគកំពូល ខេមបូឌានស៊ូភើខាប់ និងជម្រុះ AFC Cup។

វិសាខា

ក្លិបបាល់ទាត់វិសាខាបានធ្វើដំណើរទៅដល់ប្រទេសថៃកាលពីថ្ងៃទី២៥ ខែមិថុនា ឆ្នាំ២០២៣នេះ។ បន្ទាប់ពីដល់ ពួកគេបានចាប់ផ្តើមហ្វឹកហាត់យ៉ាងសកម្មនៅលើទឹកដីប្រទេសថៃ ប៉ុន្តែនៅមិនទាន់ដឹងច្បាស់ថាតើវិសាខាត្រូវប្រកួតមិត្តភាពអន្តរជាតិប៉ុន្មានលើកជាមួយក្លិបរបស់ប្រទេសថៃ។ យ៉ាងណា ក្លិបនេះទំនងបោះជំរំហ្វឹកហាត់នៅថៃច្រើនថ្ងៃ។

ព្រះខ័នរាជស្វាយរៀង

ក្លិបដែលមានមូលដ្ឋាននៅខេត្តស្វាយរៀងនឹងចេញដំណើរទៅប្រទេសថៃនាដើមខែកក្កដាខាងមុខដើម្បីប្រកួតមិត្តភាពអន្តរជាតិជាមួយក្លិបអាជីពរបស់ប្រទេសថៃ។ តាមការគ្រោងទុក ព្រះខ័នរាជស្វាយរៀងក្រោមការដឹកនាំដោយគ្រូបង្វឹកសញ្ជាតិអេស្ប៉ាញ Pep Muñoz នឹងមានការប្រកួតមិត្តភាពពីរគឺជាមួយក្លិបលីគកំពូល និងជាមួយក្លិបលីគទី២របស់ប្រទេសថៃ។

ក្រសួងការពារជាតិ

ក្លិបបាល់ទាត់ក្រសួងការពារជាតិកំពុងប្រកួតពានរង្វាន់មិត្តភាពកម្តៅសាច់ដុំមុនបើករដូវកាល KCC Pre-Season Cup 2023 ខណៈពេលនេះពួកគេបានឈានដល់វគ្គពាក់កណ្តាលផ្តាច់ព្រ័ត្រហើយដោយជួបក្លិបណាហ្គាវើលដ៍នៅថ្ងៃសៅរ៍ ទី១ ខែកក្កដា។ ទោះបីជាយ៉ាងណា ក្លិបបានប្រកាសរួចហើយពីផែនការទៅប្រកួតមិត្តភាពកម្តៅសាច់ដុំនៅប្រទេសថៃនាពេលខាងមុខ ប៉ុន្តែមិនទាន់ច្បាស់ថ្ងៃចេញដំណើរ និងធ្វើការប្រកួតប៉ុន្មានលើកជាមួយក្លិបរបស់ថៃ។

ខេមបូឌានព្រីមៀរលីគរដូវកាល២០២៣-២៤ នឹងចាប់ផ្តើមនៅថ្ងៃសៅរ៍ ទី៥ ខែសីហា ដែលមានក្លិបចំនួន១០គឺ ម្ចាស់ជើងឯកភ្នំពេញក្រោន ព្រះខ័នរាជស្វាយរៀង វិសាខា ណាហ្គាវើលដ៍ បឹងកេត ក្រសួងការពារជាតិ អង្គរថាយហ្គឺរ គិរីវង់សុខសែនជ័យ និងសមាជិកថ្មី អាយអេសអាយ ដង្កោសែនជ័យ និង ព្រៃវែងអេហ្វស៊ី៕

អត្ថបទ៖ វីរបុត្រ