ភ្លៀងធ្លាក់មួយមេធំ លិចផ្លូវ និងស្ទះចរាចរណ៍នៅ ភូកេត ខណៈកម្ពស់​ទឹកឡើងលើសកន្លះម៉ែត្រ

ភ្លៀងធ្លាក់ខ្លាំងបានបង្កឲ្យមានការជន់លិចផ្លូវ និងស្ទះចរាចរណ៍សម្រាប់យានយន្តធុនតូចនៅក្នុងខេត្តភូកេត ភាគខាងត្បូងប្រទេសថៃកាលពីថ្ងៃអាទិត្យ ខណៈតំបន់ផ្សេងៗរបស់ខេត្តរមណីយដ្ឋានមួយនេះក៏រងផលប៉ះពាល់ផងដែរ ។

តំបន់ដែលរងផលប៉ះពាល់ទាំងនោះរួមមាន Khao Khat, Ao Yon, Phaniang Sam Kongnam, Tha Khraeng, Rai Foon, Dao Roong និងតំបន់ Chaofa Sakdidet ស្ថិតនៅក្នុងស្រុក Muang ហើយដោយសារតែកម្រិតទឹកមានជម្រៅជ្រៅពេក ទើបបណ្ដាលឲ្យរថយន្តតូចៗដែលកំពុងធ្វើដំណើរឆ្លងកាត់ត្រូវជាប់គាំង ។

ទឹកជំនន់នៅតំបន់ទាំងនេះមានជម្រៅយ៉ាងតិច ៦០ សង់ទីម៉ែត្រ ខណៈនៅ​តំបន់ Patong, Kathu និងតំបន់ Kor Kathu ស្ថិតក្នុងស្រុក​ Kathu ទឹកជំនន់ដែលបណ្ដាលមកពីភ្លៀងធ្លាក់ខ្លាំងមានកម្ពស់លើសពីកន្លះម៉ែត្រទៅទៀត ។

ពាក់ព័ន្ធនឹងបញ្ហានេះដែរ នាយកដ្ឋានឧតុនិយមថៃបានព្យាករណ៍ថា នៅតាមបណ្តោយឆ្នេរសមុទ្រភាគខាងលិច និងភាគខាងត្បូងរួមទាំងខេត្តភូកេតផងដែរនោះ នឹងបន្តមានភ្លៀងធ្លាក់ក្នុងកម្រិត ៤០ ទៅ ៦០ ភាគរយ ចាប់ពីថ្ងៃចន្ទដល់ថ្ងៃពុធ ហើយបន្ទាប់មកពី ៦០ ទៅ ៧០ ភាគរយនៅថ្ងៃព្រហស្បតិ៍ និងថ្ងៃសុក្រ ៕

ប្រែសម្រួលដោយ ៖ ជីវ័ន្ត

ប្រភព ៖ Bangkok Post

ចុចអាន ៖ បញ្ហាចំនួន ២ នឹងដាក់បញ្ចូលក្នុងកិច្ចប្រជុំចង្អៀតរដ្ឋមន្ត្រីការបរទេស អាស៊ាន