ព័ត៌មានជាតិ

ក.អ.ក ប្រកាសដាក់ឲ្យប្រើប្រាស់ជាផ្លូវការសៀវភៅស្ដីពីការវិនិយោគនៅកម្ពុជា

បានផុស

២ years មុន

នៅ

ថ្ងៃអង្គារ ១១ កក្កដា ២០២៣

ដោយ

ក្រុមប្រឹក្សាអភិវឌ្ឍន៍កម្ពុជា (ក.អ.ក.) បានប្រកាសដាក់ឲ្យប្រើប្រាស់ជាផ្លូវការសៀវភៅស្ដីពីការវិនិយោគនៅកម្ពុជា ដែលនឹងអាចជួយទាក់ទាញរំហូរវិនិយោគប្រកបដោយគុណភាពមកកាន់ព្រះរាជាណាចក្រកម្ពុជាកាន់តែច្រើនបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីប្រកាសឲ្យប្រើប្រាស់សៀវភៅស្ដីពីការវិនិយោគនៅកម្ពុជា កាលពីថ្ងៃទី ១០ កក្កដា លោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា (ក.អ.ក.) បានមានប្រសាសន៍ថា សៀវភៅស្ដីពីការវិនិយោគនៅកម្ពុជា ជាសមិទ្ធផល នៃកិច្ចសហប្រតិបត្តិការរវាង ក.អ.ក. និងរដ្ឋាភិបាលអូស្ត្រាលី តាមរយៈគំនិតផ្ដួចផ្ដើមស្ដីពីការវិនិយោគបរទេស និងហេដ្ឋារចនាសម្ព័ន្ធរូបវន្តក្នុងតំបន់មេគង្គ។

លោករដ្ឋមន្ត្រីប្រតិភូ បានថ្លែងនូវការកោតសរសើរជូនចំពោះក្រុមការងាររៀបចំសៀវភៅស្ដីពីការវិនិយោគនៅកម្ពុជា ដែលបានរួមគ្នាចងក្រង និងធ្វើបច្ចុប្បន្នភាពព័ត៌មានគន្លឹះនានា សម្រាប់ជាពុទ្ធិដល់វិនិយោគិន ដើម្បីសិក្សាស្វែងយល់អំពីវឌ្ឍនភាព នៃបរិស្ថានវិនិយោគ ក៏ដូចជាកាលានុវត្តភាពវិនិយោគនៅកម្ពុជា។

ទន្ទឹមនឹងនេះ លោករដ្ឋមន្ត្រីប្រតិភូ ក៏បានវាយតម្លៃខ្ពស់ជូនចំពោះរដ្ឋាភិបាលអូស្ត្រាលី ដែលជានិច្ចកាលតែងតែចូលរួមចំណែកជាមួយរាជរដ្ឋាភិបាលកម្ពុជាក្នុងការអភិវឌ្ឍប្រទេសលើគ្រប់វិស័យ។ ជាក់ស្ដែងក្នុងក្របខ័ណ្ឌ កិច្ចសហប្រតិបត្តិការទ្វេភាគី និងពហុភាគីលើវិស័យវិនិយោគ ភាគីទាំងពីរ បានចុះអនុស្សរណៈ នៃការយោគយល់គ្នា ស្ដីពីកិច្ចសហប្រតិបត្តិការវិនិយោគទ្វេភាគី ក៏ដូចជាកិច្ចព្រមព្រៀងពាណិជ្ជកម្មសេរីអាស៊ាន-អូស្ត្រាលី-នូវែលសេឡង់។ បន្ថែមពីលើឯកសារគតិយុត្តិខាងលើ គំនិតផ្ដួចផ្ដើម និងគម្រោងនានារបស់រដ្ឋាភិបាលអូស្ត្រាលី ត្រូវបានដាក់ចេញឲ្យអនុវត្តជាបន្តបន្ទាប់ សំដៅគាំទ្រដល់យុទ្ធនាការជំរុញ និងទាក់ទាញរំហូរវិនិយោគប្រកបដោយគុណភាពមកកាន់ព្រះរាជាណាចក្រកម្ពុជាបន្ថែមពីលើកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការធ្វើឲ្យប្រសើរឡើងនូវបរិស្ថានវិនិយោគ ក៏ដូចជាការបង្កើតនូវក្របខ័ណ្ឌច្បាប់ និងគតិយុត្តិដែលបើកចំហ មានតម្លាភាព អាចប៉ាន់ប្រមាណទុកជាមុន និងប្រកបដោយភាពអំណោយផលសម្រាប់ការវិនិយោគដើម្បីអភិវឌ្ឍន៍សង្គម-សេដ្ឋកិច្ច។

លើសពីនេះ លោករដ្ឋមន្ត្រីប្រតិភូ ក៏បានគូសរំលេចអំពីតុវិនិយោគកសិ-ចំណីអាហារ (AFID) ដែល ជាផ្លែផ្កា នៃកិច្ចសហប្រតិបត្តិការរវាង ក.អ.ក. និងភាគីអូស្ត្រាលី ក្នុងការរួមចំណែកជំរុញការផ្សព្វផ្សាយ និងពង្រឹងសមត្ថភាពរបស់មន្ត្រីក្នុងការទាក់ទាញវិនិយោគក្នុងវិស័យកសិកម្មដែលជាវិស័យដ៏មានសក្ដានុពលរបស់កម្ពុជា។

ទន្ទឹមនេះ លោករដ្ឋមន្ត្រីប្រតិភូ ក៏បានបង្ហាញនូវក្ដីសង្ឃឹមយ៉ាងមុតមាំថា កម្ពុជា នឹងបន្តផ្ដល់ការគាំទ្រដល់យុទ្ធសាស្ត្រសេដ្ឋកិច្ចអាស៊ីអាគ្នេយ៍របស់រដ្ឋាភិបាលអូស្ត្រាលី និងច្បាមយកប្រយោជន៍សេដ្ឋកិច្ចជាអតិបរមាពីយុទ្ធសាស្ត្រប្រកបដោយចក្ខុវិស័យវែងឆ្ងាយមួយនេះ។ ក្នុងន័យនេះ លោករដ្ឋមន្ត្រី ក៏បានបង្ហាញអំពីឆន្ទៈក្នុងការជំរុញវិនិយោគិនអូស្ត្រាលីមកវិនិយោគនៅកម្ពុជា សំដៅរួមចំណែកដល់ការធ្វើពិពិធកម្មគោលដៅវិនិយោគនៅកម្ពុជាលើវិស័យគន្លឹះនានា ទាំងក្រោមរូបភាពវិនិយោគដោយផ្ទាល់ ឬ ដោយចូលហ៊ុនជាមួយសហគ្រាសក្នុងស្រុក ឬ ភាពជាដៃគូរវាងរដ្ឋ និងវិស័យឯកជន។

លោក Nicholas Moore បេសកជនពិសេសទទួលបន្ទុកកិច្ចការអាស៊ីអាគ្នេយ៍ នៃរដ្ឋាភិបាលអូស្ត្រាលី បានថ្លែងអំណរគុណជូនចំពោះ ក.អ.ក. ដែលតែងតែផ្ដល់កិច្ចសហការយ៉ាងជិតស្និទ្ធជាមួយរដ្ឋាភិបាល និងវិស័យឯកជនអូស្ត្រាលី តាមរយៈការសម្របសម្រួល, ផ្ដល់ការលើកទឹកចិត្ត និងផ្ដល់ការថែទាំលើគម្រោងវិនិយោគនានាដែលបាននិងកំពុងមានអត្ថិភាពលើទឹកដីកម្ពុជា៕

អត្ថបទ ៖ សំអឿន