ស្ត្រីមានផ្ទៃពោះ មកពិនិត្យ និងសម្រាលកូន នៅមន្ទីរពេទ្យគន្ធបុប្ផាទី៣ កើនឡើង

មកដល់ពាក់កណ្ដាលឆ្នាំ២០២៣នេះ ចំនួនស្ត្រីមានផ្ទៃពោះ មកពិនិត្យតាមដានផ្ទៃពោះ និងសម្រាលកូន នៅមន្ទីរពេទ្យគន្ធបុប្ផាទី៣ បានកើនឡើងចំនួន ៣៥ ភាគរយ បើប្រៀបធៀបរយៈពេលដូចគ្នា ក្នុងឆ្នាំ២០២២។

លោកសាស្ត្រាចារ្យ គី សន់ទី ប្រធានមន្ទីរពេទ្យគន្ធបុប្ផា បានឱ្យ “កម្ពុជាថ្មី” ដឹងថា នៅផ្នែកសម្ភព នៃមន្ទីរពេទ្យគន្ធបុប្ផាទី៣ (ពេទ្យជ័យវរ្ម័នទី៧) ស្រ្តីមានផ្ទៃពោះចំនួន ៥១ ៦២៩ករណី​ បានមកពិនិត្យតាមដានផ្ទៃពោះ និងព្យាបាល នៅក្នុងផ្នែកពិគ្រោះជំងឺក្រៅ នៃមន្ទីរសម្ភព​ និងសម្រាលកូន មានចំនួន ១០ ០៦២ នាក់ ​​កើនឡើង ៣៥% ខណៈអត្រាមរណភាពកុមារក្នុងមន្ទីរពេទ្យមានចំនួន ០,៤%។

ប្រធានមន្ទីរពេទ្យគន្ធបុប្ផា បានឱ្យដឹងបន្ថែមថា ការកើនឡើងចំនួនស្ត្រីមានផ្ទៃពោះ មកពិនិត្យ និងសម្ភព នៅមន្ទីរពេទ្យគន្ធបុប្ផាទី៣នេះ ដោយសារការស្បើយ នៃការរីករាលដាលជំងឺកូវីដ-១៩ ទើបនាំឱ្យស្រ្តីមានផ្ទៃពោះអាចមកពិនិត្យសុខភាព និងសម្ភពនៅមន្ទីរពេទ្យ ដែលនាំឱ្យមានកំណើនដូចកាលមិនទាន់មានកូវីដ-១៩ ដែរ។

លោកសាស្ត្រាចារ្យ គី សន់ទី បានឱ្យដឹងថា ក្នុងខែមិថុនា ឆ្នាំ២០២៣ នៅផ្នែកសម្ភព នៃមន្ទីរពេទ្យជ័យវរ្ម័នទី៧ (គន្ធបុប្ផាទី៣) មានស្រ្តីមានផ្ទៃពោះចំនួន ៩ ៥៣៤ នាក់ បានមកពិនិត្យតាមដានផ្ទៃពោះ និងព្យាបាល នៅក្នុងផ្នែកពិគ្រោះជំងឺក្រៅ នៃមន្ទីរសម្ភព និងសម្រាលកូនបានចំនួន ១ ៧៤៣ នាក់។

គួរបញ្ជាក់ថា រាល់ការព្យាបាលទាំងអស់នៅមន្ទីរពេទ្យគន្ធបុប្ផាទាំងនៅរាជធានីភ្នំពេញ និងខេត្តសៀមរាប គឺមិនគិតថ្លៃសម្រាប់គ្រប់ៗគ្នា ដោយគ្មានការរើសអើង។ មន្ទីរពេទ្យគន្ធបុប្ផាទាំង ៥ទីតាំង នៅតែត្រូវការថវិកាជាប្រចាំប្រមាណ ៨៤ ម៉ឺនដុល្លារក្នុង ១សប្តាហ៍ ឬត្រូវចំណាយ ប្រមាណ ៤០ លានដុល្លារ ក្នុង១ឆ្នាំ ដើម្បីធ្វើប្រតិបត្តិការមនុស្សធម៌សង្រ្គោះជីវិតកុមារនៅកម្ពុជា ដោយមានការជួយបំពេញបន្ថែមគ្នាទៅវិញទៅមក រវាងមូលនិធិគន្ធបុប្ផាស្វីស និងមូលនិធិ គន្ធបុប្ផាកម្ពុជា ក៏ដូចជាពីសំណាក់ក្រសួងសុខាភិបាល នៃព្រះរាជាណាចក្រកម្ពុជា។ ការបរិច្ចាគនេះតែមួយអាចគ្រប់គ្រាន់នៅឡើយទេសម្រាប់ការគាំទ្រផ្នែកហិរញ្ញវត្ថុដល់មន្ទីរពេទ្យគន្ធបុប្ផា ព្រោះមន្ទីរពេទ្យនេះ មិនមែនជាស្ថាប័នដែលរកប្រាក់ចំណូល។

មូលនិធិគន្ធបុប្ធាកម្ពុជាបានបង្កើត KHQR CODE (ទាំងប្រាក់រៀល និងដុល្លារអាមេរិក) សម្រាប់គ្រប់ App ធនាគារទាំងអស់ក្នុងព្រះរាជាណាចក្រកម្ពុជា ដែលមានកម្មវិធីស្ដែន QR CODE ដើម្បីសម្រួលដល់ការចូលរួមបរិច្ចាគពីសំណាក់សប្បុរសជននានា ក្នុងគោលបំណង ជួយ នាំភាពញញឹមដល់កុមារដែលជាអនាគតដ៏ភ្លឺស្វាងរបស់កម្ពុជា តាមរយៈការរួម​គ្នា រក្សានិរន្តរភាព  នៃកិច្ចដំណើរការរបស់មន្ទីរពេទ្យគន្ធបុប្ផា ទាំង ៥ទីតាំង នៅព្រះរាជាណាចក្រកម្ពុជា៕

អត្ថបទ៖ ច័ន្ទ វីរៈ