លោក អ៊ុន​ ជឹម ៖ គណបក្សឯកភាពជាតិខ្មែរ ទទួលយកលទ្ធផលបោះឆ្នោតដោយក្ដីសោមនស្សរីករាយ

ប្រធានគណបក្សឯកភាពជាតិខ្មែរ បានអះអាងថា ការបោះឆ្នោតជ្រើសតាំង តំណាងរាស្រ្ដ នីតិកាលទី ៧ កាលពីថ្ងៃអាទិត្យ ទី ២៣ ខែកក្កដា ឆ្នាំ ២០២៣កន្លងទៅនេះ បានប្រព្រឹត្តទៅដោយសេរី និងយុត្តិធម៌។ ក្នុងនោះដែរ គណបក្សឯកភាពជាតិខ្មែរ បានសម្រេចទទួលយកលទ្ធផលបោះឆ្នោតដោយក្ដីសោមនស្សរីករាយ។  

លោក អ៊ុន​ ជឹម ប្រធានគណបក្សឯកភាពជាតិខ្មែរ មានប្រសាសន៍ប្រាប់កម្ពុជាថ្មី នៅថ្ងៃទី ៣ ខែសីហានេះថា គណបក្សរបស់លោក បានបើកកិច្ចប្រជុំកាលពីថ្ងៃទី ៣០ ខែកក្កដា ឆ្នាំ ២០២៣ ដោយអង្គប្រជុំទាំងមូល បានសម្រេចគាំទ្រគណៈកម្មាធិការជាតិរៀបចំការបោះឆ្នោត (គ.ជ.ប) និងទទួលយកនូវលទ្ធផលការបោះឆ្នោតជ្រើសតាំង តំណាងរាស្រ្ដ នីតិកាលទី ៧ កាលពីថ្ងៃទី ២៣ ខែកក្កដា ឆ្នាំ ២០២៣កន្លងទៅនេះ។

លោក អ៊ុន​ ជឹម បានបន្តថា គណបក្សឯកភាពជាតិខ្មែររបស់លោក យល់ឃើញថា ការបោះឆ្នោតជ្រើសតាំង តំណាងរាស្រ្ដ នីតិកាលទី ៧នេះ ពិតជាបានប្រព្រឹត្តទៅដោយសេរី និងយុត្តិធម៌ ហើយគណបក្សឯកភាពជាតិខ្មែរ សម្រេចទទួលយកលទ្ធផលបោះឆ្នោតដោយក្ដីសោមនស្សរីករាយ។

បន្ថែមពីលើនេះ គណបក្សឯកភាពជាតិខ្មែរ បានជូនពរដល់គណបក្សប្រជាជនកម្ពុជា និងគណបក្សហ៊្វុនស៊ិនប៉ិច ដែលទទួលបានអាសនៈក្នុងរដ្ឋសភាជាតិ។ ក្នុងនោះដែរ គណបក្សឯកភាពជាតិខ្មែរ សង្ឃឹមថា តំណាងរាស្រ្ដមកពីគណបក្សទាំងពីរ នឹងចុះជួយប្រជាពលរដ្ឋឲ្យបានសកម្ម ដូចភ្លៀងរលឹមចាប់ពីថ្ងៃជាប់ឆ្នោតនេះតទៅ។

លទ្ធផលបោះឆ្នោតបណ្ដោះអាសន្ន ដែលប្រកាសដោយ គ.ជ.ប កាលពីថ្ងៃទី ១ ខែសីហា ឆ្នាំ ២០២៣ បានបង្ហាញថា គណបក្សឯកភាពជាតិខ្មែរ បានទទួលសំឡេងគាំទ្រពីប្រជាពលរដ្ឋចំនួន ២៥,២៦១សំឡេង៕