សម្ព័ន្ធភាពបណ្តុំសមាគមអង្គការសង្គមស៊ីវិល និងគណបក្សខ្មែរអភិរក្ស ថ្កោលទោសនាយករដ្ឋមន្ត្រីស្តីទី ថៃ

សម្ព័ន្ធភាពបណ្តុំសមាគមអង្គការសង្គមស៊ីវិល ដែលមានសមាជិក ២២ អង្គភាព និងគណបក្សខ្មែរអភិរក្ស បានចេញសេចក្តីថ្លែងការណ៍ថ្កោលទោសនាយករដ្ឋមន្ត្រីស្តីទីថៃ លោក Phumtham Wechayachai ដែលបានលើកឡើងថ្មីៗនេះ ទាក់ទងនឹងការរៀបចំអនុវត្តវិធានការផ្លូវច្បាប់ក្នុងស្រុករបស់ប្រទេសថៃចំពោះថ្នាក់ដឹកនាំកម្ពុជា។

ក្នុងសេចក្តីថ្កោលទោសនោះ បានលើកឡើងថា ទង្វើរបស់នាយករដ្ឋមន្ត្រីស្តីទីថៃ ជាការរំលោភអធិបតេយ្យភាព និងបូរណភាពទឹកដីកម្ពុជា។ បន្ថែមពីនេះ ក៏ធ្វើឱ្យខាតបង់ទំនាក់ទំនងរបស់ប្រទេសទាំងពីរ រួមទាំងកិច្ចខិតខំប្រឹងប្រែងដែលសម្រេចឱ្យមានបទឈប់បាញ់ ដើម្បីស្វែងរកសន្តិភាព​និងប្រក្រតីភាពប្រទេសទាំងពីរមកវិញដែរ។

សម្ព័ន្ធភាពបណ្តុំសមាគមអង្គការសង្គមស៊ីវិល និងគណបក្សខ្មែរអភិរក្ស ចាត់ទុកការគំរាមកំហែង ការប្រើប្រាស់ច្បាប់ប្រទេសថៃមកលើថ្នាក់ដឹកនាំកម្ពុជា នឹងធ្វើឱ្យខូចខាតដល់ការស្តារទំនុកចិត្តទំនាក់ទំនងប្រទេសទាំងពីរឡើងវិញ រួមទាំងការអនុវត្តបទឈប់បាញ់ដែលចូលជាធរមាននៅយប់ថ្ងៃទី២៨ ខែកក្កដា ឆ្នាំ២០២៥ និងការចុះហត្ថលេខារបស់ភាគីទាំងពីរ ក្នុងកិច្ចប្រជុំវិសាមញ្ញនៃគណៈកម្មាធិការព្រំដែនទូទៅ កម្ពុជា-ថៃ (GBC) កាលពីថ្ងៃទី៧ ខែសីហា ឆ្នាំ២០២៥។

ជាមួយនឹងការថ្កោលទោស សម្ព័ន្ធភាពបណ្តុំសមាគមអង្គការសង្គមស៊ីវិល និងគណបក្សខ្មែរអភិរក្ស អំពាវនាវដល់សហគមន៍អន្តរជាតិ សមាជិកអាសាន ប្រធានប្តូរវេនអាស៊ាន ជួយជំរុញឱ្យថៃគោរពឱ្យបាននូវអធិបតេយ្យភាព និងបូរណភាពទឹកដីកម្ពុជា និងគោរពគ្នាទៅវិញទៅមក ដើម្បីសម្រេចបាននូវសន្តិភាព ស្ថេរភាព ព្រមទាំងអាចស្តារទំនាក់ទំនងរវាងប្រទេសថៃ និងកម្ពុជា មកវិញឱ្យបានឆាប់៕