ភរិយានាយ ពែកមី កំពុងសង្គ្រោះបន្ទាន់ក្រោយចូលកែសម្ផស្សនៅហាង អេស88​ប៊ីយូធី ខណៈ​អាជ្ញាធរចុះធ្វើកំណត់ហេតុបិទបណ្ដោះអាសន្ន

មានការភ្ញាក់ផ្អើលសម្រាប់អ្នកគាំទ្រ និងមហាជនបន្ទាប់ពីមានដំណឹងថា ភរិយារបស់តារាកំប្លែងល្បីឈ្មោះនាយ ពែកមីមានអាការៈធ្ងន់ធ្ងរក្រោយពេលទៅទទួលសេវាកម្មចាក់សេរ៉ូមខូលជិន ចាក់វីតាមីន លើផ្ទៃមុខនៅក្នុងហាងកែសម្ផស្សយីហោ អេស88ប៊ីយូធីស្ថិតនៅម្តុំផ្សាថ្មី។

ប្រភពបានឲ្យដឹងថា ភរិយាតារាកំប្លែងនាយ ពែកមី បន្ទាប់ពីមានអាការៈមិនស្រួលក៏ត្រូវបានបញ្ជូនទៅសង្គ្រោះនៅមន្ទីរពេទ្យកាល់ម៉ែត្រ ខណ:ទីតាំងហាងខាងលើត្រូវបានសមត្ថកិច្ចចុះធ្វើកំណត់ហេតុបិទបន្ទាប់ពីរកឃេីញថា ទីតាំងមួយកន្លែងនេះមិនមានអជ្ញាបណ្ណ័ត្រឹមត្រូវ និងបានធ្វេីឲ្យប្រពន្ធតារាកំប្លែងនាយ ពែកមី មានអាការៈធ្ងន់ធ្ងរក្រោយទទួលសេវាកម្មចាក់សេរ៉ូម ខូលជិន ចាក់វីតាមីនផ្ទៃមុខ។

តារាកំប្លែងនាយ ពែកមី បានប្រាប់កម្ពុជាថ្មីតាមទូរស័ព្ទនៅព្រឹកថ្ងៃទី០៤ ខែសីហា ឆ្នាំ២០២៣នេះថា មកទល់ពេលនេះភរិយារបស់លោកកំពុងស្ថិតនៅក្នុងបន្ទប់ICU(សង្គ្រោះបន្ទាន់) ក្រោយទៅទទួលសេវាកម្មចាក់សេរ៉ូមខូលជិនវីតាមីនផ្ទៃមុខ។ លោកបានបញ្ជាក់ថា ភរិយាលោកត្រូវបានបញ្ជូនចូលសង្គ្រោះបន្ទាន់នៅមន្ទីរពេទ្យតាំងពីថ្ងៃទី០២ ខែសីហាមកម្លេះ។

យ៉ាងណាមិញតារាកំប្លែងរូបនេះមិនទាន់បានបញ្ជាក់លម្អិតជុំវិញរឿងនេះទេ ដោយនិយាយដោយខ្លីថា ទុកឲ្យសមត្ថកិច្ចធ្វើការងារនេះទៅតាមជំនាញសិន ហើយបើមានអ្វីទៀតលោកនឹងបញ្ជាក់ប្រាប់បន្ថែមនៅពេលក្រោយ។

សូមបញ្ជាក់ដែរថា ទីតាំងហាងកែសម្ផស្សយីហោ អេស88 ប៊ីយូធី ខាងលេីនេះ គឺស្ថិតនៅផ្ទះលេខ១ ១០E0តាមបណ្តោយផ្លូវលេខ៥៣ សង្កាត់ផ្សារថ្មី៣ ខណ្ឌដូនពេញ៕

អត្ថបទ៖ ចាន់រ៉ា