កីឡា

សម្ដែងមានភាពទាក់ទាញ និងប្លែកភ្នែកជានិច្ចបានធ្វើឲ្យក្រុមតេក្វាន់ដូ ITF មានការស្នើសុំឲ្យចូលរួមកម្មវិធីធំ-តូចជាច្រើន

បានផុស

១ ខែ មុន

នៅ

ថ្ងៃអង្គារ ២ មិថុនា ២០២៦

ដោយ

ក្រុមកីឡាតេក្វាន់ដូ ITF កម្ពុជា ដែលដឹកនាំដោយលោក កែវ រ៉េមី ជាប្រធានសហព័ន្ធមិនត្រឹមតែមានសមត្ថភាពប្រកួតខ្លាំង និងកេរ្តិ៍ឈ្មោះល្បីនោះទេ ពោលការសម្ដែងក្នុងកម្មវិធីកីឡាធំ-តូច ក៏មានការគាំទ្រច្រើនផងដែរ និងទទួលបានការស្នើសុំឲ្យចូលរួមជាបន្តបន្ទាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កែវ រ៉េមី ប្រធានសហព័ន្ធ

ក្រុមកីឡាតេក្វាន់ដូ ITF កម្ពុជា ដែលដឹកនាំដោយលោកទេសរដ្ឋមន្ត្រី កែវ រ៉េមី នៅក្នុងមជ្ឈដ្ឋានកីឡានេះគឺនរណាក៏ទទួលស្គាល់ពីសមត្ថភាព និងភាពខ្លាំងក្លារបស់កីឡាករ កីឡាការិនីផងដែរ តាមរយៈការដណ្ដើមបានមេដាយគ្រប់កម្រិតនៅលើឆាកអន្តរជាតិនាពេលកន្លង។

ក្រៅពីសមត្ថភាពប្រកួត វិន័យក្នុងការប្រមូលផ្ដុំហ្វឹកហាត់ហើយនោះក្រុមតេក្វាន់ដូ ITF ក៏មានឈ្មោះល្បី និងឧស្សាហ៍បង្ហាញមុខក្នុងកម្មវិធីកីឡាធំ-តូច ជាច្រើនតាមរយៈការសម្ដែងក្បាច់ស្នៀត និងឈុតឆាកប្រយុទ្ធផ្សេងៗដើម្បីបង្កើនបរិយាកាសឲ្យកាន់តែសប្បាយរីករាយ។

ទិដ្ឋភាពសម្ដែងកន្លងទៅ

ដោយភាពប៉ិនប្រសព្វលើការរៀបចំសម្ដែងធ្វើឲ្យមានសកម្មភាពប្លែកៗ និងថ្មីពីមួយកម្មវិធីទៅមួយកម្មវិធីពីលោក ប៉ាល់ ជីវ័ន និងលោក ទ្រី វលក្ខណ៍ ដែលជាគ្រូបង្វឹកនោះបានធ្វើឲ្យក្រុមតេក្វាន់ដូ ITF នេះមានការគាំទ្រច្រើន និងមានការស្នើសុំមកកាន់សហព័ន្ធឲ្យទៅសម្ដែងជាបន្តបន្ទាប់។

ទិដ្ឋភាពសម្ដែងកន្លងទៅ

នេះបើតាមការលើកឡើងរបស់លោក ប៉ាល់ ជីវ័ន នាពេលកន្លងទៅធ្លាប់បានបញ្ជាក់ថា រាល់ការសម្ដែងរបស់ក្រុមតេក្វាន់ដូ ITF ដែលរៀបចំដោយសហព័ន្ធនេះគឺតែងតែព្យាយាមរកនូវឈុតឆាកសម្ដែងណាដែលប្លែកៗ និងល្អមើលជូនអ្នកទស្សនាបានកម្សាន្តសប្បាយ និងបានស្គាល់ពីក្បាច់គុននេះផង។ បើទោះជាការសម្ដែងខ្លះទទួលបានការឧបត្ថម្ភលើកទឹកចិត្តដល់ក្រុមកីឡាករ ឬមិនបានឧបត្ថម្ភយ៉ាងណាក្ដីក៏ក្រុមកូនសិស្សរបស់លោកតែងតែចំណាយពេលហ្វឹកហាត់សម និងសម្ដែងអស់ពីចិត្តជានិច្ចដើម្បីធ្វើឲ្យកម្មវិធីកីឡាផ្សេងៗទាំងអស់នោះមានការគាំទ្រប្រកបដោយទស្សនីយភាពប្លែកអារម្មណ៍។

ទិដ្ឋភាពសម្ដែងកន្លងទៅ

បញ្ជាក់ដែរថា រាល់ការទទួលសម្ដែងរបស់ក្រុមតេក្វាន់ដូ ITF ក្នុងកម្មវិធីផ្សេងៗកន្លងមកគឺតែងតែមានកីឡាករ កីឡាការិនី និងថ្នាលជាច្រើននាក់ និងបានសម្ដែងច្រើនក្បាច់ស្នៀតជូនអ្នកទស្សនា។ កីឡាករ កីឡាការិនី រួមទាំងថ្នាលតូច-ធំនេះគឺមកពីក្រុមជម្រើសជាតិ និងក្លឹបផ្សេងៗចំណុះឲ្យសហព័ន្ធតេក្វាន់ដូ ITF។ ការដឹកនាំសម្ដែងកន្លងទៅនេះដោយគ្រូជម្រើសជាតិលោក ប៉ាល់ ជីវ័ន លោក ទ្រី វលក្ខណ៍ និងបានការចង្អុលបង្ហាញពីថ្នាក់ដឹកនាំសហព័ន្ធផងដែរ។ បើរាប់ត្រឹម ២-៣ខែចុងក្រោយនេះក្រុមតេក្វាន់ដូ ITF កម្ពុជាបានចូលរួមសម្ដែងក្នុងពិធីបិទកីឡាសិស្សបឋមសិក្សាថ្នាក់ជាតិ ឆ្នាំ២០២៦ នៅវិមានពហុកីឡដ្ឋានជាតិ ចូលរួមសម្ដែងក្នុងការប្រកួតវគ្គផ្ដាច់ព្រ័ត្រពានរង្វាន់វិទ្យាល័យនៅពហុកីឡដ្ឋានជាតិ ចូលរួមសម្ដែងបិទការប្រកួតកីឡាវាយសីនគរបាលអាស៊ីអាគ្នេយ៍ នៅមជ្ឈមណ្ឌលអភិវឌ្ឍធនធានកីឡាជាតិកម្ពុជាក្នុងបរិវេណសាលាបឋមសិក្សាចៅពញាហុក កាលពីថ្ងៃទី៣០ ឧសភា និងគ្រោងចូលរួមសម្ដែងក្នុងកម្មវិធីប្រកួតកីឡាឧត្តមសិក្សាឆាប់ៗនៅពេលខាងមុខនេះទៀត៕