បញ្ជូនបុរសទះកំផ្លៀងនារីម្នាក់ ពាក់ព័ន្ធនឹងបញ្ហាជិះម៉ូតូសាចទឹក ទៅតុលាការចាត់ការបន្ត

បុរសដែលទះកំផ្លៀងនារីម្នាក់ ពាក់ព័ន្ធនឹងបញ្ហាជិះម៉ូតូសាចទឹក ពេលធ្វើដំណើរតាមដងផ្លូវនោះ ត្រូវបានសមត្ថកិច្ចបញ្ជូនទៅតុលាការ ដើម្បីចាត់វិធានការតាមផ្លូវច្បាប់ហើយ។

លោកឧត្ដមសេនីយ៍ត្រី​ សាន សុខសីហា អ្នកនាំពាក្យ នៃស្នងការដ្ឋាននគរបាលរាជធានីភ្នំពេ បានឲ្យដឹងនៅថ្ងៃទី ៣០ ខែសីហានេះថា «នៅព្រឹកនេះ អធិការដ្ឋាននគរបាលខណ្ឌសែនសុខ បានកសាងសំណុំរឿងបញ្ជូនបុរសម្នាក់ ដែលប្រើប្រាស់ហិង្សាលើស្ត្រីម្នាក់​ នៅខណ្ឌសែនសុខ ក្នុងករណីជិះម៉ូតូសាចទឹកដាក់គ្នាហ្នឹង អញ្ចឹងនៅព្រឹកនេះ បានបញ្ជូនទៅសាលាដំបូងរាជធានីភ្នំពេញ ដើម្បីអនុវត្តបន្តតាមនីតិវិធីច្បាប់»។

បើតាមឃ្លីបវីដេអូមួយ ដែលបានចែកចាយលើបណ្ដាញសង្គមហ្វេសប៊ុក កាលពីថ្ងៃទី ២៥ ខែសីហា មានមនុស្សប្រុស-ស្រី ៣នាក់ បានឈ្លោះប្រកែកគ្នារឿងជិម៉ូតូសាចទឹក នៅពេលធ្វើដំណើរលើដងផ្លូវ។ ប៉ុន្តែ អ្វីគួរឲ្យចាប់អារម្មណ៍នោះ គឺគ្រាន់តែសាចទឹកដាក់គ្នាបន្តិចបន្តួច បែរជាបុរសម្នាក់ហ៊ានលើកដៃទះមនុស្សស្រី ហើយបង្កឲ្យមានការប្រតាយប្រតប់គ្នា។

មួយថ្ងៃក្រោយមក សមត្ថកិច្ចបានទទួលពាក្យបណ្តឹងពីជនរងគ្រោះ ហើយក៏បានស្រាវជ្រាវរហូតឃាត់ខ្លួនបុរសរូបនោះ កាលពីថ្ងៃទី ២៨ ខែសីហា ឆ្នាំ ២០២៣។ បន្ទាប់ពីសាកសួរចប់សព្វគ្រប់ នគរបាលខណ្ឌសែនសុខ បានបញ្ជូនបុរសរូបនេះ ទៅតុលាការនៅព្រឹកថ្ងៃទី ៣០ ខែសីហា ឆ្នាំ ២០២៣នេះ៕