រថយន្តដឹកសាំងមួយគ្រឿងបានក្រឡាប់ ផ្អេីលដល់អ្នកភូមិនាំគ្នាមកត្រងយកប្រេង

រថយន្តដឹកប្រេងសាំងមួយគ្រឿងរបស់ក្រុមហ៊ុន សាវីម៉ិច បានក្រឡាប់នៅពេលបើកគេចរថយន្តឆ្លងកាត់ពីមុខ ដែលបណ្តាលឲ្យក្រឡាប់ ហើយហៀប្រេងពេញផ្លូវ និងបណ្តាលឲ្យម៉ូតូកង់បីមួយគ្រឿងខូចខាត។

តាមប្រភពពីប្រជាពលរដ្ឋនៅកន្លែងកើតហេតុ បានឲ្យដឹងថា មានរថយន្តដឹកប្រេងចំណុះ ៣២ ០០០លីត្រ ជារបស់ក្រុមហ៊ុន សាវីម៉ីច ពាក់ស្លាកលេខ 4A-3981 បើកបរពីទិសដៅពីកើតទៅលិច ស្រាប់តែមកចំណុចកើតហេតុ ត្រង់ផ្លូវបត់ចូលភ្នំស្រីភ្នំប្រុស រថយន្តដឹកប្រេងនេះ ក៏បានបើកគេចរថយន្តមួយទៀត ដែលបម្រុងបើកឆ្លងផ្លូវជាតិលេខ៧ ហើយក៏ក្រឡាប់តែម្តង។ ហេតុការណ៍នេះ កើតឡើងនៅម៉ោង២៖៣០នាទីរសៀល ថ្ងៃទី៣១ ខែសីហា ឆ្នាំ ២០២៣ ស្ថិតក្នុងភូមិអណ្តូងជ្រោះ ឃុំអំពិល ស្រុកកំពង់សៀម ខេត្តកំពង់ចាម។

ក្រោយពីបើគេចរថយន្តមួយនោះមក បានបណ្តាលឲ្យរថយន្តដឹកប្រេងក្រឡាប់ ហើយបានសង្កត់លើម៉ូតូកង់បីត្រូវចំហៀង ប៉ុន្តែ មិនបណ្តាលឲ្យមនុស្សរងរបួសឡើយ។ តាមការបញ្ជាក់ពីតៃកុង រថយន្តដឹកប្រេងនេះ ដឹកចំណុះ ៣២ ០០០លីត្រដែលបែងចែកជា ២ផ្នែក គឺប្រេងសាំង ៨ ០០០លីត្រ និងប្រេងម៉ាសូត ២៤ ០០០លីត្រ។ ក្រោយពីកើតហេតុភ្លាមៗ ប្រជាពលរដ្ឋដែលរស់នៅតំបន់នោះ ទាំងក្មេង ទាំងចាស់ នាំគ្នាមកដួសយកប្រេង ដែលហូរទៅលើផ្លូវ ដោយប្រជាពលរដ្ឋខ្លះយកកាដុង និងខ្លះយកធុង៕

អត្ថបទ និងរូបភាព៖ ឡេក ចាន់ពេជ្រ