អ្នកជំនាញ រំពឹងថា កម្ពុជានឹងទាក់ទាញបានកំណើន​ធុរជនបរទេស ក្រោយមានជំនួប​ក្រៅផ្លូវការ​ជាមួយសម្តេច ហ៊ុន ម៉ាណែត

ក្រៅពីកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ នៅឥណ្ឌូនេស៊ី សម្តេចធិបតី ហ៊ុន ម៉ាណែត នាយករដ្ឋ​មន្រ្តីកម្ពុជា បានចូលរួមកិច្ចប្រជុំវិនិយោគធុរកិច្ចអាស៊ាន ដោយក្នុងនោះបានជួបជាមួយពាណិជ្ជករ​អាស៊ានជាច្រើន​នៅក្នុងទីក្រុងហ្សាកាតា ប្រទេសឥណ្ឌូនេស៊ី។ នេះបើតាមការបញ្ជាក់របស់អ្នកឧកញ៉ា លឹម ហេង អនុប្រធាន​សភាពាណិជ្ជកម្មកម្ពុជា។

ថ្លែងប្រាប់កម្ពុជាថ្មីពីប្រទេសឥណ្ឌូនេស៊ី អ្នកឧកញ៉ា លឹម ហេង បានលើកឡើងដូច្នេះថា«នេះជាកិត្តិយសណាស់​សម្រាប់ប្រទេសកម្ពុជា ដែលមាននាយករដ្ឋមន្រ្តីថ្មីវ័យក្មេង បានចូលរួមកិច្ចប្រជុំកំពូលអាស៊ាន ដោយមានសុឆន្ទៈ​ក្នុងការជំរុញអាស៊ានតែមួយ ដំណើរការសេដ្ឋកិច្ចរួមគ្នា ដែលនេះជាចំណុចសំខាន់ណាស់ ពោលគឺធ្វើអ្វីៗ​ដើម្បី​សហគមន៍សេដ្ឋកិច្ចអាស៊ាន»។

បើតាមអ្នកឧកញ៉ា លឹម ហេង វត្តមានរបស់សម្តេចនាយករដ្ឋមន្រ្តី ហ៊ុន ម៉ាណែត ក្នុងកិច្ចប្រជុំកំពូលអាស៊ាននាពេលនេះ បាននាំមកនូវផ្លែផ្កាយ៉ាងត្រចះត្រចង់សម្រាប់ប្រទេសកម្ពុជា ពោលគឺជាសមិទ្ធផលថ្មីសម្រាប់នាយករដ្ឋមន្ត្រីថ្មី ជាពិសេស​ផ្តល់​ផល​ប្រយោជន៍ផ្នែកសេដ្ឋកិច្ច ទំនាក់ទំនងនយោបាយ ទាំងក្នុងអាស៊ាន និងសហគមន៍សេដ្ឋកិច្ចអាស៊ានផងដែរ។

លោកបណ្ឌិត គី សេរីវឌ្ឍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា មើលឃើញថា ការចូលរួមរបស់សម្តេចធិបតី ហ៊ុន ម៉ាណែត នឹងជួយពង្រឹងទំនាក់ទំនងរវាងបណ្តាប្រទេសនៅក្នុងតំបន់អាស៊ាន ជាពិសេសទំនាក់ទំនងផ្នែកពា​ណិជ្ជ​កម្ម។ ក្រៅពីនេះ លោកបណ្ឌិតបានកត់សម្គាល់លើវិស័យចំនួនពីររបស់កម្ពុជា នឹងអាចទាក់ទាញបានវិនិយោគិន​ពីតំបន់​អាស៊ាន នោះគឺវិស័យកសិកម្ម និងទេសចរណ៍។ លោកមើលឃើញថា ប្រទេសចំនួនបី រួមមាន ឥណ្ឌូនេស៊ី ថៃ និងវៀត​ណាម គឺជាប្រទេសដែលមានបច្ចេកទេសកែច្នៃកសិកម្មខ្ពស់ អាចនឹងចូលមកវិនិយោគនៅកម្ពុជា ក្រោយពីមាន​ការប្រើ​ថ្វីមាត់​ទាក់ទាញដ៏ជំនាញរបស់សម្តេចនាយករដ្ឋមន្រ្តីហ៊ុន ម៉ាណែត។ ដោយឡែកវិស័យទេសចរណ៍ ក៏ជាផ្នែកមួយ​មានសក្តានុពល ប៉ុន្តែមានការធ្លាក់ចុះនៅក្នុងតំបន់អាស៊ាន។ លោកបណ្ឌិត គី សេរីវឌ្ឍន៍ បានគូសបញ្ជាក់ថា ប្រសិនបើ​មានការលើកទឹកចិត្តឱ្យមានរំហូរទេសចរ ក៏ជាចលនាហិរញ្ញវត្ថុឱ្យមានរង្វិលជុំនៅក្នុងតំបន់អាស៊ាន ជាពិសេស​បានរួមចំណែកជំរុញកំណើនសេដ្ឋកិច្ចផងដែរ។

លោក ឡោ វិចិត្រ អនុប្រធានសមាគមពាណិជ្ជកម្ម កម្ពុជា-ចិន និងជាអ្នកតាមដានព្រឹត្តិការណ៍សង្គមសេដ្ឋកិច្ច បាន​លើក​ឡើងថា សម្តេចនាយករដ្ឋមន្រ្តី ហ៊ុន ម៉ាណែត នឹងថ្លែងទៅកាន់ធុរកិច្ចជននានា ក្នុងក្របខណ្ឌអាស៊ាន អំពីការ​បើកចំហរសេដ្ឋកិច្ចកម្ពុជា ស្របពេលដែលកម្ពុជា កំពុងធ្វើដំណើរឆ្ពោះទៅកាន់ប្រទេស​ដែលមានចំណូល​មធ្យម​កម្រិតខ្ពស់ និងប្រទេសមានចំណូលខ្ពស់នៅឆ្នាំ ២០៥០។ បើតាមលោក ឡោ វិចិត្រ នេះគឺជាសារដ៏មានសារសំខាន់ ដើម្បីស្រូបទាញទុនវិនិយោគក្រៅប្រទេស( FDI) បន្ថែមចូលមកកម្ពុជា ដើម្បីអភិវឌ្ឍសេដ្ឋកិច្ចឱ្យរឹងមាំស្រប​តាមបហិច្ឆតា​របស់រាជរដ្ឋាភិបាល៕