សេដ្ឋកិច្ច

ក្រុមហ៊ុនរស្ស៊ី មានបំណងស្វែងរកដៃគូសហការនៅកម្ពុជាផ្នែកឱសថ និងអាហារបំប៉នសត្វចិញ្ចឹម

បានផុស

៦ ខែ មុន

នៅ

ថ្ងៃសុក្រ ២៤ តុលា ២០២៥

ដោយ

ក្រុមហ៊ុន Alpharma និងក្រុមហ៊ុន Talina Group របស់រុស្ស៊ី បានបង្ហាញពីបំណងរបស់ខ្លួនក្នុងការស្វែងរកដៃគូសហការនៅកម្ពុជា ក្នុងផ្នែកឱសថ និងក្នុងផ្នែកអាហារបំប៉នសម្រាប់សត្វចិញ្ចឹម។

ក្នុងឱកាសចូលជួបពិភាក្សាការងារ ជាមួយអនុរដ្ឋលេខាធិការក្រសួងពាណិជ្ជកម្ម តំណាងក្រុមហ៊ុន Alpharma របស់រុស្ស៊ី បានលើកឡើងពីគោលបំណងរបស់ខ្លួនក្នុងការស្វែងរកដៃគូសហការនៅកម្ពុជា ក្នុងផ្នែកឱសថ។

ទន្ទឹមនោះ តំណាងក្រុមហ៊ុនTalina Group ក៏បានបង្ហាញបំណងស្វែងរកដៃគូរសហការនៅកម្ពុជាផងដែរក្នុងផ្នែកអាហារបំប៉នសម្រាប់សត្វចិញ្ចឹម។

ជាការឆ្លើយតប លោកលឹម ផាន់ភារៈ ក៏បានជម្រាបជូនតំណាងក្រុមហ៊ុនទាំងពីរ អំពីកាលានុវត្តភាព និងអត្ថប្រយោជន៍នៃការវិនិយោគនៅកម្ពុជា រួមមានការលើកទឹកចិត្តនិងកិច្ចគាំពារវិនិយោគ ការទទួលបានទីផ្សារនាំចេញទូលំទូលាយជាមួយនឹងការអនុគ្រោះពន្ធគយតាមរយៈកិច្ចព្រមព្រៀងពាណិជ្ជកម្មសេរីដែលកម្ពុជាសម្រចបាន។

សូមជម្រាបថា កម្ពុជា តាមរយៈក្រសួងពាណិជ្ជកម្មបានអញ្ជើញចូលរួមក្នុងវេទិកានាំចេញអន្តរជាតិ “Made in Russia” ក្រោមអធិបតីភាព លោក មីខាអ៊ីល មីស្ស៊ូស្ទីន (Mikhail Mishustin) នាយករដ្ឋមន្រ្តីរុស្ស៊ី ជាមួយវត្តមាននៃមន្រ្តីជាន់ខ្ពស់រដ្ឋាភិបាល ថ្នាក់ដឹកនាំធុរកិច្ច អ្នកជំនាញ ក្រុមហ៊ុននាំចេញរុស្ស៊ីនិងបរទេស សរុបប្រមាណ ៥០០០រូប មកពីបណ្តាប្រទេសជាង៨០ ជុំវិញពិភពលោក។

វេទិកាប្រចាំឆ្នាំនេះ បានរៀបចំឡើងក្នុងគោលបំណងលើកកម្ពស់កិច្ចសហប្រតិបត្តិការពាណិជ្ជកម្មនិងសេដ្ឋកិច្ច ជាពិសេសជំរុញការធ្វើពាណិជ្ជកម្មអន្តរជាតិរវាងរុស្ស៊ីនិងបណ្តាប្រទេសដៃគូ៕