ក្រោយបញ្ចប់ការពិនិត្យព្រះរាជសុខភាព ព្រះមហាក្សត្រ និងសម្ដេចម៉ែ យាងនិវត្តន៍មកដល់កម្ពុជារសៀលនេះ

ព្រះមហាក្សត្រ ព្រះបាទ សម្ដេចព្រះបរមនាថ នរោត្ដម សីហមុនី និងព្រះមហាក្សត្រី នរោត្តម មុនិនាថ សីហនុ យាង និវត្តន៍មកកម្ពុជា នារសៀលនេះ ក្រោយបញ្ចប់ការពិនិត្យព្រះរាជសុខភាព រយៈពេលមួយខែ នៅក្នុងទីក្រុងប៉េកាំង ប្រទេសចិន។

ជាក់ស្ដែង កំឡុងពេលដែល សម្ដេច នរោត្ដម សីហមុនី និងសម្ដេចម៉ែ គង់ប្រថាប់នៅក្នុងព្រះរាជវាំងក្នុងប្រទេស ដើម្បីពិនិត្យព្រះរាជសុខភាព​ ឆ្លៀតក្នុងឱកាសនោះ លោក ស៊ីជិនពីង ប្រធានាធិបតីចិន បានយាងអញ្ជើញ សម្ដេចនរោត្ដម សីហមុនី ចូលរួមកម្មវិធីបើកព្រឹត្តិការណ៍កីឡាអាស៊ីលើកទី១៩ ដែលប្រព្រឹត្តទៅកាលពីថ្ងៃទី២៣ខែកញ្ញា។

(សម្ដេចនរោត្ដម សីហមុនី យាងចូលរួមកម្មវិធីបើកព្រឹត្តិការណ៍ប្រកួតកីឡាអាស៊ីលើកទី១៩ កាលពីថ្ងៃទី២៣ខែកញ្ញា ឆ្នាំ២០២៣។)

សូមជម្រាបបន្តិចថា ព្រះមហាក្សត្រកម្ពុជា និងសម្ដេចម៉ែ​ តែងតែយាងទៅពិនិត្យព្រះរាជសុខភាពទ្រង់ ជាទៀងទាត់ រយៈពេល៦ខែម្ដង តាមការយាងរបស់ក្រុមគ្រូពេទ្យ នៅក្នុងប្រទេសចិន។ សម្រាប់ក្នុងឆ្នាំ២០២៣នេះ ព្រះមហាក្សត្រទ្រង់យាងទៅពិនិត្យព្រះរាជសុខភាព លើកទី១ កាលពីថ្ងៃទី ១២ ខែកុម្ភៈ ហើយព្រះមហាក្សត្រ និងសម្ដេចម៉ែ ទ្រង់យាងនិវត្តន៍មកដល់កម្ពុជាវិញ កាលពីថ្ងៃទី១៦ ខែមិនាឆ្នាំ២០២៣។ សម្រាប់លើកទី២វិញ ព្រះមហាក្សត្របានយាងពីប្រទេសកម្ពុជាកាលពីថ្ងៃទីទី២៨ ខែសីហា ឆ្នាំ២០២៣៕

ដោយ៖ ង៉ិល ណារ៉ាត់