កាតា ជួយសម្រួលឲ្យមានការផ្អាកបាញ់នៅតំបន់ហ្គាហ្សាបាន ២ ថ្ងៃទៀត

រដ្ឋាភិបាលរបស់ប្រទេសកាតាប្រកាសថា បានឈានដល់កិច្ចព្រមព្រៀងថ្មីបន្ថែមក្នុងការបន្តការផ្អាកបាញ់មនុស្សធម៌នៅតំបន់ហ្គាហ្សាស្ទ្រីបរយៈពេល ២ ថ្ងៃទៀត ស្របពេលដែលក្រុមប្រដាប់អាវុធប៉ាឡេស្ទីនហាម៉ាសក៏បានដោះលែងក្រុមចំណាប់ខ្មាំងអ៊ីស្រាអែល ១១ នាក់ផ្សេងទៀត និងប្រគល់ទៅឲ្យកាកបាទក្រហម ។

អ្នក​នាំ​ពាក្យ​ក្រសួង​ការ​បរទេស​កាតា​បាន​​បង្ហោះ​តាម​ប្រព័ន្ធ​ផ្សព្វផ្សាយ​សង្គម​កាល​ពី​ថ្ងៃ​ចន្ទថា ក្រោយការដោះលែងចំណាប់ខ្មាំងនេះហើយ នាំ​ឲ្យចំនួន​ឈ្លើយសឹកដែល​ក្រុម​ហាម៉ាស​ដោះលែង​ឡើង​ដល់ ​៦៩ ​នាក់ រួម​ទាំង​ជនបរទេសផងដែរ ខណៈខាងអ៊ីស្រាអែល​បាន​ដោះលែង​អ្នកទោស​ប៉ាឡេស្ទីនដែលកំពុងជាប់ពន្ធនាគារ ១១៧ នាក់ ។

ក្រុមប្រដាប់អាវុធប៉ាឡេស្ទីនហាម៉ាសកាលពីយប់ថ្ងៃចន្ទបានចេញសេចក្តីថ្លែងការណ៍បញ្ជាក់ថា ខ្លួនបានឯកភាព ក៏ដូចជាព្រមព្រៀងជាមួយប្រទេសកាតា និងអេហ្ស៊ីបក្នុងការបន្តការផ្អាកបាញ់មនុស្សធម៌រយៈពេល ២ ថ្ងៃទៀត ប៉ុន្តែធ្វើយ៉ាងណា អ៊ីស្រាអែលក៏ត្រូវតែស្ថិតនៅក្រោមលក្ខខណ្ឌដូចគ្នាទៅនឹងកិច្ចព្រមព្រៀងកាលពី ៤ ថ្ងៃមុនផងដែរ ។

នៅក្នុងកិច្ចព្រមព្រៀងនោះទៀតសោត ក្រុមហាម៉ាសបានទាមទារឲ្យមានការដោះលែងអ្នកទោសប៉ាឡេស្ទីន ៣ នាក់ជាថ្នូរនឹងចំណាប៉ខ្មាំងអ៊ីស្រាអែលម្នាក់ ហើយក្រុមប្រដាប់អាវុធមួយនេះក៏បានអំពាវនាវឲ្យមានការអនុញ្ញាត ឬជួយសម្រួលទៅដល់រថយន្តដឹកជំនួយមនុស្សធម៌ចំនួន ២០០ គ្រឿង ចូលទៅក្នុងតំបន់ហ្គាហ្សាជារៀងរាល់ថ្ងៃផងដែរ ។

ទន្ទឹមនោះ ការពង្រីកកិច្ចព្រមព្រៀងបន្តការផ្អាកបាញ់មនុស្សធម៌រយៈពេល ២ ថ្ងៃបន្ថែមទៀតនេះរវាងអ៊ីស្រាអែល និងក្រុមហាម៉ាសកើតមានឡើង បន្ទាប់ពីកិច្ចព្រមព្រៀងគ្នាលើកដំបូងរយៈពេល ៤ ថ្ងៃដែលបានចាប់ផ្តើមកាលពីថ្ងៃសុក្រ ទី២៤ ខែវិច្ឆិកាបានអស់សុពលភាពកាលពីថ្ងៃចន្ទ ខណៈក្នុងកិច្ចព្រមព្រៀងនោះ ក្រុមហាម៉ាសបានសន្យានឹងដោះលែងចំណាប់ខ្មាំងជាថ្នូរនឹងការដោះលែងអ្នកទោសប៉ាឡេស្ទីនពីសំណាក់អ៊ីស្រាអែល ។

គួរបញ្ជាក់ថា ក្នុងអំឡុងពេលកិច្ចព្រមព្រៀងបទឈប់បាញ់រយៈពេល ៣ ថ្ងៃដំបូង ក្រុមប្រដាប់អាវុធប៉ាឡេស្ទីនហាម៉ាស់បានដោះលែងជនជាតិអ៊ីស្រាអែល ៤០ នាក់ និងជនបរទេស ១៨ នាក់ ខណៈដែលខាងអ៊ីស្រាអែលវិញបានដោះលែងជនជាតិប៉ាឡេស្ទីនចំនួន ១១៧ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អ៊ីស្រាអែលនិងក្រុមហាម៉ាស ដោះដូរចំណាប់ខ្មាំង-អ្នកទោស ជាលើកទី៣