សម្ដេចធិបតី ហ៊ុន ម៉ាណែត ៖ កម្ពុជា​ បានក្លាយជាគោលដៅទេសចរណ៍ដ៏ទាក់ទាញ​ ជាមួយស្នាមញញឹមរបស់ប្រជាជនខ្មែរ

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ប្រទេសកម្ពុជា​ បានក្លាយជាគោលដៅទេសចរណ៍ដ៏ទាក់ទាញ​ ជាមួយស្នាមញញឹមរបស់ប្រជាជនខ្មែរ​ សុខសុវត្ថិភាព និងសណ្តាប់ធ្នាប់សាធារណៈ។

សម្ដេចធិបតី ហ៊ុន ម៉ាណែត បានបង្ហោះសារនៅក្នុងបណ្ដាញសង្គមតេលេក្រាម និងហ្វេសប៊ុក នារសៀលថ្ងៃទី ២៨ ខែវិច្ឆិកានេះថា រយៈពេល ២ថ្ងៃ នៃព្រះរាជពិធីបុណ្យអុំទូក​​ បណ្តែតប្រទីប​ និងសំពះព្រះខែ អកអំបុក គឺនៅថ្ងៃទី ២៦-​២៧ ខែវិច្ឆិកា កន្លងទៅនេះ បានប្រព្រឹត្តទៅដោយរលូន​ ជាមួយសុខសុវត្ថិភាព​ និងភាពសប្បាយរីករាយដល់មហាគ្រួសារខ្មែរ​ ក៏ដូចជាភ្ញៀវបរទេស ជាពិសេសចំណុះទូក-ង របស់ជនជាតិអាឡឺម៉ង់ មកពីខេត្តកណ្តាល​ ក៏បានផ្តល់ភាពទាក់ទាញ និងចំណាប់អារម្មណ៍ ពីសំណាក់មហាជន ផងដែរ។

សម្ដេចនាយករដ្ឋមន្ត្រី បានសរសេរបន្តថា «កម្ពុជា​ បានក្លាយជាគោលដៅទេសចរណ៍ដ៏ទាក់ទាញ​ ជាមួយស្នាមញញឹមរបស់ប្រជាជនខ្មែរ​ សុខសុវត្ថិភាព និងសណ្តាប់ធ្នាប់សាធារណៈ ​ផ្តល់ជាសេចក្តីសុខផ្នែកផ្លូវចិត្តដល់អ្នកទេសចរណ៍ ក្នុងការធ្វើដំណើរ​ និងទស្សនាកំសាន្តដោយភាពជឿជាក់បំផុត»។

សម្ដេចធិបតី ហ៊ុន ម៉ាណែត បានបន្ថែមថា «នាថ្ងៃទីបី​ នៃព្រះរាជពិធីបុណ្យជាតិដ៏ធំនេះ សូមលោកតាលោកយាយ អ៊ំពូមីង បងប្អូនទាំងអស់ រីករាយទស្សនាកម្រងរូបភាពផ្សេងៗ​ ប្រកបដោយភាពរីករាយ​ និងអនុស្សាវរីយ៍ល្អៗជាមួយគ្នា​ ក្នុងមហាគ្រួសារខ្មែរ​ ក្រោមម្លប់ដ៏ត្រជាក់នៃសុខសន្តិភាព»។

បើតាមលោក ម៉េត មាសភក្ដី អ្នកនាំពាក្យរដ្ឋបាលរាជធានីភ្នំពេញ បានឲ្យដឹងថា ក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក រយៈពេល ២ថ្ងៃមកនេះ មានភ្ញៀវទេសចរជាតិ-អន្តរជាតិ បានមកដើរលេងកម្សាន្ត នៅរាជធានីភ្នំពេញ ប្រមាណជិត ៣លាននាក់។ ក្នុងនោះ ថ្ងៃទី ១ មានអ្នកដើរលេងកម្សាន្ដប្រមាណជាង ១លាន ២សែននាក់ និងថ្ងៃទី ២ មានប្រមាណជាង ១លាន ៧សែននាក់៕