ព័ត៌មានអន្ដរជាតិ

ហ្ស៊កដានី៖ អ៊ីស្រាអែល មិនអាចឈ្នះឡើយ

បានផុស

១ year មុន

នៅ

ថ្ងៃចន្ទ ១១ ធ្នូ ២០២៣

ដោយ

រដ្ឋមន្ត្រីការបរទេសហ្ស៊កដានីអះអាងថា អ៊ីស្រាអែលមិនអាចទទួលបានជ័យជម្នះផ្នែកយោធានៅក្នុងតំបន់ហ្គាហ្សាបានទេ ហើយតាមពិត អ៊ីស្រាអែល ទទួលរងបរាជ័យជាយុទ្ធសាស្ត្ររួចទៅហើយ។

រដ្ឋមន្ត្រីការបរទេសហ្ស៊កដានីលោក Ayman Safadi (រូបថត៖ Anadolu)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងកាលពីថ្ងៃអាទិត្យនៅឯវេទិកា ដូហា ដែលជាព្រឹត្តិការណ៍ប្រមូលផ្តុំអ្នកការទូតប្រចាំឆ្នាំក្នុងរាជធានីរបស់កាតា លោក Ayman Safadi និយាយថា គោលដៅនៃប្រតិបត្តិការរបស់អ៊ីស្រាអែលប្រឆាំងនឹងក្រុមហាម៉ាស គឺបណ្តេញប្រជាជនប៉ាឡេស្ទីន ជាជាងកម្ចាត់ក្រុមសកម្មប្រយុទ្ធ។

លោកបន្តថា ការបំផ្លិចបំផ្លាញនៅហ្គាហ្សា ក្នុងរយៈពេលពីរខែកន្លងមកនេះ គឺជាសញ្ញាបង្ហាញពីគោលនយោបាយរបស់អ៊ីស្រាអែល ដែលហាក់ដូចជាចង់ការបណ្តេញពលរដ្ឋចេញពីតំបន់នេះ។ លោកបន្ថែមថា មន្ត្រីជាន់ខ្ពស់អ៊ីស្រាអែល រួមទាំងរដ្ឋមន្ត្រីសន្តិសុខជាតិ Itamar Ben-Gvir និងរដ្ឋមន្ត្រីហិរញ្ញវត្ថុ Bezalel Smotrich ផងដែរនោះ បាននិយាយដោយត្រង់អំពីចេតនានេះ។

លោក Safadi ក៏បាននិយាយអំពីការបោះឆ្នោតកាលពីថ្ងៃសុក្រ នៅឯក្រុមប្រឹក្សាសន្តិសុខអង្គការសហប្រជាជាតិផងដែរ ដែលក្នុងនោះ សហរដ្ឋអាមេរិកបានវេតូលើសំណើរបស់បណ្តាប្រទេសអារ៉ាប់ ដែលជំរុញឲ្យមានបទឈប់បាញ់មនុស្សធម៌នៅហ្គាហ្សា។ ទីក្រុងវ៉ាស៊ីនតោន ជាសមាជិកតែមួយគត់ ដែលបោះឆ្នោតប្រឆាំង ខណៈសម្ព័ន្ធមិត្តអាមេរិកគឺ ចក្រភពអង់គ្លេស គឺជាសមាជិកតែមួយគត់នៃស្ថាប័នមាន១៥ប្រទេសនេះ ដែលអនុបវាទ។

រដ្ឋមន្ត្រីសន្តិសុខជាតិអ៊ីស្រាអែលលោក Itamar Ben-Gvir (រូបថត៖ Flash90)

យ៉ាងណា អ្នកការទូតកំពូលរបស់ហ្ស៊កដានីកត់សម្គាល់ថា ទោះបីជាមានការវេតូក៏ដោយ ប៉ុន្តែទីក្រុងវ៉ាស៊ីនតោន កំពុងអំពាវនាវជាសាធារណៈឲ្យអ៊ីស្រាអែល ផ្លាស់ប្តូរយុទ្ធសាស្ត្រយោធា។

លោកសង្កត់ធ្ងន់ថា “និយាយឲ្យសាមញ្ញ អ៊ីស្រាអែលកំពុងផ្គើនអ្នករាល់គ្នា ទាំងសម្ព័ន្ធមិត្ត ច្បាប់អន្តរជាតិ និងអង្គការសហប្រជាជាតិ។ អ៊ីស្រាអែល បានបង្កើតចំនួននៃការស្អប់ខ្ពើមដែលនឹងលងបន្លាចតំបន់នេះ ហើយពួកគេនឹងកំណត់អនាគតមនុស្សជំនាន់ក្រោយ។ ពួកគេធ្វើឲ្យប៉ះពាល់ដល់ប្រជាជនរបស់ពួកគេ ដូចដែលប៉ះពាល់ដល់អ្នករាល់គ្នាក្នុងតំបន់ដែរ”។

សូមបញ្ជាក់ជាថ្មី អ៊ីស្រាអែលបានចាប់ផ្តើមយុទ្ធនាការយោធារបស់ខ្លួននៅតំបន់ហ្គាហ្សា បន្ទាប់ពីក្រុមយុទ្ធជនហាម៉ាស បុកទម្លុះខែលព្រំដែនកាលពីថ្ងៃទី៧ខែតុលា ហើយវាយឆ្មក់ទីតាំងនិងមូលដ្ឋានយោធាជាច្រើននៅភាគខាងត្បូងប្រទេសអ៊ីស្រាអែល ជាលទ្ធផលបណ្តាលឲ្យមនុស្សជាង ១២០០នាក់ បាត់បង់ជីវិត។

ដោយឡែកគិតត្រឹមថ្ងៃអាទិត្យទី១០ខែធ្នូ តួលេខមនុស្សស្លាប់នៅហ្គាហ្សា មានច្រើនជាង១៧៧០០នាក់ ដោយក្នុងនោះប្រហែលពីរភាគបីគឺជាស្ត្រី និងកុមារ៕

ប្រែសម្រួល៖ Vann Vann

ប្រភព៖ RT

ចុចអាន៖ ក្រុមហាម៉ាសព្រមានថា ចំណាប់ខ្មាំង នឹងគ្មានជីវិតចេញពីតំបន់ហ្គាហ្សា ឡើយ